Jastar isi sektory stýdentterge aýyzashar berdi
Qazaqstan musylmandary dinı basqarmasynyń Jastar isi sektory qasıetti Ramazan aıynda L.N.Gýmılev atyndaǵy Eýrazııa ulttyq ýnıversıtetiniń dintaný mamandyǵy boıynsha bilim alyp jatqan stýdentterine aýyzashar berdi.
Rýhanı basqosýda Jastar isi sektorynyń meńgerýshisi Ádilet Rahymuly stýdentterge dindegi jastardyń orny men orazanyń mańyzdylyǵy týraly túsindirip ótti.
«Búgingi jas stýdent – erteńgi jas maman. Din máselesi – óte názik taqyryp. Halyqtyń dinı saýatyn kóterý úshin bolashaq dintanýshy mamandar retinde alǵan bilimderimizdi barynsha qoldanýymyz kerek. Dinniń aq-qarasyn ajyratyp, tolyqqandy taldaý jasaıtyn mamandar búginde tapshy. Osy tapshylyqty toltyryp, jańa lep beretin – sizder. Endeshe, sizderdiń qazirgi ıgerip jatqan bilimderińizdiń mańyzy zor» dedi Ádilet Rahymuly.
Sonymen birge sektor meńgerýshisi jastardyń atsalysýymen atqarylyp jatqan jumystaryna toqtalyp, Dinı basqarmanyń 7 baǵyty jaıly da sóz etti.
