«Jasyl aımaqtaǵy» aýyldyq meshitterde juma namazyn oqý boıynsha QMDB májilisi ótti (FOTO)
Búgin Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń kezekti Apparat jınalysy ótti.
QMDB aýmaqtyq ókildikteriniń bas ımamdarynyń qatysýymen ótkizilgen onlaın májiliste elimizdiń Epıdemııalogııalyq jaǵdaıdyń «jasyl aımaqtarynda» ornalasqan aýyldyq meshitterde sanıtarlyq talaptardy saqtaı otyryp, juma namazyn ótkizý tártibine qatysty josparlanǵan birqatar máseleler qaraldy.
Atap aıtqanda, meshitke kelýshi jamaǵattyń sanıtarlyq talaptardy qatań saqtaýyn qadaǵalaý, solardyń ishinde meshitke kelýshilerdi dene qyzýyn ólsheıtin qurylǵylar arqyly tekserip kirgizý, antıseptıktermen qamtamasyz etý, jamaǵat namazy kezinde 1 metr qashyqtyqty saqtaı otyryp, arnaıy belgilengen orynda qulshylyq jasaý, namaz oqıtyn ǵımaratty zalalsyzdandyrý is-sharalaryn júrgizý, paryz namazynyń ótelýinen keıin, kóp uzamaı meshitti bosatýǵa qatysty mańyzdy máseleler talqylandy.
Jınalysta Bas múftı Naýryzbaı qajy Taǵanuly ımamdarǵa juma namazy kezinde saqtyq sharalaryn jeke baqylaýdy, sanıtarlyq talaptardyń oryndalýyn qatań qadaǵalaýdy tapsyrdy.
Aıta ketsek, jýyrda QMDB Tóraǵasy Naýryzbaı qajy Taǵanuly elordada Densaýlyq saqtaý mınıstri Alekseı Tsoımen arnaıy kezdesip, osy máseleni talqylaǵan bolatyn. Sondaı-aq Densaýlyq saqtaý vıtse-mınıstri – Bas memlekettik sanıtarlyq dáriger Erlan Qııasovpen kezdesýde Bas múftı koronavırýs ınfektsııasynyń taralýy boıynsha qaýipsiz «jasyl aımaqta» ornalasqan óńirlerdegi meshitterde juma namazyn oqýǵa ruqsat berý týraly usynysyn jetkizgen edi.
Búginde meshitterde profılaktıkalyq jáne Epıdemııaǵa qarsy sharalar qatań saqtalyp keledi. Osyǵan oraı, aldaǵy juma kúni qaýipsiz «jasyl aımaqta» ornalasqan aýyldyq meshitterde sanıtarlyq talaptardy saqtaı otyryp, juma namazy oqylmaq.
