JOǴARǴY IMAM BAS MEShITTE ÝAǴYZ AITADY (FOTO)
Ál-Azhar sheıhy, Joǵarǵy ımam Ahmet Taıyp 14-15 qyrkúıek kúni elordadaǵy Táýelsizdik saraıynda ótetin Álemdik jáne dástúrli dinder lıderleriniń VII Sezine, sondaı-aq 16 qyrkúıek kúni QMDB janyndaǵy Respýblıkalyq bas meshitte juma namazyna qatysyp, ýaǵyz aıtady.
Ál-Azhar sheıhy, Joǵarǵy ımam – Islam basshylarynyń eń joǵarǵy ataǵy. 1679 jyldan 2022 jylǵa deıin 50 din qaıratkeri ál-Azhardyń Joǵarǵy ımamy boldy. Eń alǵashqy joǵarǵy ımamdar Muhammed ál-Harashı, Ibrahım ál-Barmaýı, Muhammed an-Nashartı bolsa, 1980 jyldardan bastap bul ataqty Muhammed Ábdirahman Bısar, Jad ál-Haq, Muhammed Saıd Tantaýı jáne Ahmet Taıyp ıelendi.
Sheıh Ahmet Taıyp – 2010 jyldan beri Ál-Azhardyń Joǵarǵy ımamy. Ol – Paıǵambarymyzdyń (oǵan Allanyń salaýaty men sálemi bolsyn) urpaǵy. Alla elshisiniń kúıeý balasy Hazireti Álı men Fatıma anamyzdyń uly Hasannan (Alla olarǵa razy bolsyn) taraǵan.
Ahmet Taıyp aǵylshyn, frantsýz tilderin jetik meńgergen. Aqıda, pálsapa salalary boıynsha birneshe kitap jazǵan.
Aıta keteıik, ál-Azhar sheıhy buryn Álemdik jáne dástúrli dinder kóshbasshylarynyń altynshy sezine de kelgen edi. Ol kezde respýblıkalyq «Áziret Sultan» meshitin zııarat etip, ımamdyqqa shyǵyp, jamaǵatqa nasıhat aıtqan bolatyn.
