Jumys isteıtin jastarǵa jaldamaly úı salynady – Elbasy
Jastar jylynyń ashylýynda Memleket basshysy Nursultan Nazarbaev Astana, Almaty jáne Shymkentte jumys isteıtin jastar úshin jylyna bir myńnan kem emes páter salýdy tapsyrdy.
«Biz Jastar jylyn jaıdan-jaı jarııalaǵan joqpyz. Biz jas qazaqstandyqtardyń qajettilikterin qamtamasyz etetin jastardy qoldaýǵa arnalaǵan qarapaıym jáne túsinikti quraldaryn ázirleýimiz kerek. Bul degenimiz 4 nárse: qoljetimdi sapaly bilim, jumys pen baspananyń bolýy, otbasy qurýǵa jaǵdaıdyń bolýy. Osy tórt nárse óte mańyzdy, buǵan jastar men memleket nazar aýdarýy tıis. Sol sebepti Úkimetke, Prezıdent ákimshiligine kelesi sharalarmen jumys isteýdi tapsyramyn», - dedi Nazarbaev.
Prezıdent Qazaqstanda jumys isteıtin jastar úshin jalǵa beriletin turǵyn úıler salynatynyn aıtty.
«Baspana máselesiniń ózektiligin esepke ala otyryp, biz qansha salsaq ta, únemi jetpeıdi. Iri qalalardyń, 3 mıllıon qalamyzdaǵy jas otbasylar úshin... Mıllıon qalalar kóp bolýy úshin, sebebi basqa álemdegi qalalar sekildi onda ǵylym, bilim, mádenıet damıdy. Sarapshylar álemniń 600 iri qalasynda álemdik ónimderdiń 60 paıyzy óndiriletinin aıtady. Almaty mılloner qala, endi Astana men Shymkent qosyldy. Kezekte taǵy eki qala tur jáne biz muny jasaımyz. Osy úsh qalada jumys isteıtin jastar úshin jylyna myńnan kem emes páter salatyn bolamyz. Bul páterler jalǵa beriletin turǵyn úı sanatyna jatqyzylýy tıis. «7-20-25» baǵdarlamasy da bul máseleni sheshýge baǵyttalǵan. Baǵdarlama boıynsha baspana alýǵa tek jumys isteıtinder úmitker bola alatynyn esten shyǵarmaý kerek. Jalǵa beriletin turǵyn úı sektoryn damytý – álemdik tájirıbe. Keńes Odaǵynda biz páterge «baılanyp» qalatyn edik. Eshqaıda kete almaısyń, óıtkeni páter seniki emes, memlekettiki, basqa jerde eshkim saǵan baspana bermeıdi. Solaı bolatyn», - dedi Elbasy Astanada jastar jylynyń saltanatty ashylý rásiminde.
Jıynda jastardy tyńdaǵan Memleket basshysy «sózdi toqtatpaı, aıta bersin degen oı keldi» dedi. Elbasy Jastar jylynyń mańyzdylyǵyn atap ótti.
QR Prezıdenti Nursultan Nazarabev búgingi jastarmen kezdesýinde jeńil ónerkásip salasyna nazar aýdardy.
Sondaı-aq, Elbasy volonter stýdentterdiń shákirtaqysyn kóterýdi tapsyrdy.
