«Jýsan» operatsııasynyń keıipkerlerimen suhbat boldy
QMDB-nyń Pavlodar oblysy boıynsha ókildiginiń uıymdastyrýymen «Máshhúr Júsip» ortalyq meshitinde «Jýsan» operatsııasy arqyly Sırııadan qaıtarylǵan eki áıelmen Pavlodar qalalyq meshit jamaǵaty kezdesý ótkizdi. Kezdesýge óńirlik baspasóz ókilderi de qatysty.
Sóz basynda ókil ımam Joldas Qospaquly: «Qazaqstan memleketi óz azamattarynyń álemniń qaı qıyrynda júrgenine qaramastan olardyń taǵdyryna qashan da alańdaıdy. El bıligi iske asyrǵan «Jýsan» operatsııasynyń nátıjesinde týǵan elge oralǵan qandastarymyz búginde memleket qamqorlyǵynda. Osyndaı adasýshylyqtyń aldyn alý maqsatynda jerlesimiz Tolǵanaı jáne Ásem atty eki qyzymyzdy sizdermen jolyqtyryp otyrmyz. Ekeýi de Baıanaýyldyq, ekeýi de 28 jasta, olar jat aǵym jetegine ketip, soǵys órti qaınap jatqan oshaǵynda bolyp, adasýdyń aýyrtpalyǵy men qıynshylyqtaryn bastarynan ótkerdi»,-deı kele sóz kezegin Tolǵanaı men Ásemge berdi.
Qaryndastarymyzdyń ekeýi de qazaq jáne orys tilinde jaqsy sóıleıdi, qazaq orta mektebin támamdaǵan eken. Biraq kúıeýleri dinde adasýshylyqta júrgendikten solardyń yqpalymen jat jurtqa adasyp barǵanyn, ondaǵy soǵys zardaby, kórgen qıyndyqtary týraly egjeı-tegjeıli áńgimelep berdi.
Tolǵanaı men Ásem kelesi kezekte meshit jamaǵatynan jáne jýrnalısterden qoılyǵan kóptegen suraqtarǵa jaýap berdi. Áıelder elimizdegi beıbitshiliktiń, mamyrajaı tirshiliktiń qadirin ýaqytynda túsinbegendigin, dinı saýaty tómen bolǵandyqtan, arbaýǵa túsip qalǵandyǵyn aıtyp kózine jas aldy.
Suhbat sońynda el men jerge degen qurmet, táýbe men sabyr, din jáne ıman tazalyǵy jaıynda nasıhat aıtylyp, Alla adasýshylyqtan saqtasyn, týra joldan taıdyrmasyn dep bata jasaldy.
