JYLDYQ ESEP-2023: BIR JYLDA 91 BASPANA KILTI TABYSTALDY
QMDB «Zeket jáne qaıyrymdylyq» qorynyń «El úlesi – páterge» qaıyrymdylyq aktsııasy aıasynda 2023 jyly baspanaǵa muqtaj 91 otbasyǵa páter kilti tabystaldy. Bul týraly qor dırektory Maqsatbek Qaıyrǵalıev habarlady.
«2023 jyly elimiz boıynsha 780 087 otbasyǵa kómek berildi. Atap aıtqanda, «El úlesi – páterge» jobasy boıynsha 27 din qyzmetkerine jáne 64 muqtaj otbasyǵa, jalpy bir jylda 91 úıdiń kilti berildi. Osyǵan deıin atalǵan joba aıasynda 715 otbasy baspanaly boldy. «Qaıyrymdy juma» aktsııasymen 39 455 otbasy kómek aldy. Al Qurban aıt merekesinde «Rabbyń úshin qurban shal» jobasy boıynsha 115 047 otbasyǵa qurbandyq eti taratyldy. Baǵdarlyq baıandamadaǵy tapsyrmaǵa saı Zeket HUB qoıma ortalyǵy jumysyn bastady jáne jyldyń qorytyndysy boıynsha qorǵa qarasty QAIYRYMDYLYQ JARSHYLARY erikteleriniń 18 óńirlik eriktiler forýmy ótti» dedi Maqsatbek Maqsotuly.
Sondaı-aq «Taıqazan» aktsııasy boıynsha 97 888 otbasyna azyq-túlikpen kómek kórsetilse, «Qoldan – qolǵa» jobasy aıasynda 12 736 otbasy qaıyrymdylyq kómek aldy. «Jetim kórseń jebeı júr» jobasy aıasynda 4 705 jetim balaǵa kómek berilse, «Mektepke jol» aktsııasy boıynsha 22 614 áleýmettik az qamtylǵan otbasylardyń balalaryna oqý quraldarymen kómek jasalyndy.
Aıta keteıik, QMDB «Zeket jáne qaıyrymdylyq» qory bilim jolyndaǵy shákirtterge, elimizdegi 9 medrese, Nur-Múbarak ýnıversıteti men Hýsamýddın as-Syǵanaqı atyndaǵy Islam ınstıtýty, shetelde dinı bilim alyp jatqan «Talaba» qaýymdastyǵy múshelerine udaıy kómek kórsetip keledi. Sondaı-aq qor eriktilerdiń atsalysýymen elimizde jáne Túrkııa, Sırııa memleketinde bolǵan ártúrli tabıǵı apat, oqys oqıǵalar kezinde kópshilikke járdem jasady.
