JYLDYQ ESEP-2023: DIN MEN DÁSTÚR BÓLIMI BIR JYLDA 42 080 ShARA UIYMDASTYRDY (FOTO)
Bul týraly elordada ótken QMDB Tóralqa májilisinde Din men dástúr bóliminiń meńgerýshisi Nurbek Esmaǵanbet baıandady.
«2023 jyly Bas múftı Naýryzbaı qajy Taǵanulynyń sheshimimen Din men dástúr bólimi ashylyp, Qoǵammen baılanys, Jastar isi jáne Áıel-qyzdar sektory birge jumys istep keledi. Qoǵammen baılanys sektory respýblıkalyq, aımaqtyq aqsaqaldar forýmynyń elimizdiń ár túkpirinde uıymdastyrylýyna uıytqy boldy. Sondaı-aq bıyl alǵash ret aqsaqaldar arasynda bata berý baıqaýy ótti. QMDB janynan qurylǵan Sarapshylar keńesiniń úsh májilisi, sondaı-aq Aqtóbede «Dosjan ıshan – Qazaqstannyń kórnekti dinı qaıratkeri jáne rýhanı aǵartýshysy» konferentsııasy men «Qazaq rýhanııatyndaǵy dástúrli Islamnyń orny» respýblıkalyq ǵylymı-tanymdyq konferentsııasy uıymdastyryldy. Bul baǵytta jyl boıyna 11 myńnan astam shara atqaryldy» dedi Nurbek Áýeshanuly.
Sondaı-aq Din men dástúr bólimine qarasty Jastar isi sektory respýblıka boıynsha nasıhat jáne saýattylyq, qoǵamdyq jumystar jáne sport baǵytynda 20 094 shara uıymdastyrdy. Bıyl zııatker jastar arasynda uıymdastyrylyp júrgen kýız oıyny din taqyrybynda alǵash ret elimizdiń meshitterinde «DINTELLECT» ataýymen ótkizildi. Oǵan meshit jamaǵatynan quralǵan komandalar qatysyp, top jarǵan tańdaýlylary respýblıkalyq kezeńge joldama aldy.
Al Áıel-qyzdar sektory respýblıka meshitterinde áıel jamaǵatynyń atsalysýymen 10 986 shara atqaryp, 408 828 adam qamtyldy. QMDB Áıel-qyzdar sektorynyń 2023 jyly atqarǵan aıtýly sharalarynyń biri – Pavlodar oblysytyq ókildiginiń uıymdastyrýymen «Islam jáne izgi qoǵam» jyly aıasynda «Qazaq dalasyndaǵy áıel mártebesi» taqyrybynda respýblıkalyq áıelder forýmy ótti. Túrkistan oblysynda ulttyq qundylyqtarymyzdy dáripteıtin «Shuǵyla» qyz-kelinshekter klýby ashyldy. Sondaı-aq Quran Kárimdi oqýdan qyzdar arasynda III respýblıkalyq baıqaýy jáne Almaty qalasynda tuńǵysh ret «Dástúr fest» kórmesi ótkizildi.
