JYLDYQ ESEP – 2025: «MUFTIYAT» BASPASYNAN 37 JAŃA KITAP JARYQ KÓRDI
Qazaqstan musylmandary dinı basqarmasy Tóraǵasy, Bas múftı Naýryzbaı qajy Taǵanulynyń bastamasymen «MUFTIYAT» baspasy esepti kezeńde dinı-aǵartýshylyq baǵyttaǵy keshendi jumystardy júzege asyrdy. Jazǵy dinı saýat ashý kýrstaryna arnalǵan oqý quraldaryn ázirleý, mazmunyn jańartý jáne qoljetimdiligin arttyrý basym baǵyttardyń biri boldy.
Bas múftı hazirettiń tapsyrmasyna sáıkes «Imandylyq álippesi» kitabynyń ekinshi tomy daıyndalyp, orys tilindegi «Azbýka very» nusqasy jaryq kórdi. Sonymen qatar dinı saýat ashý kýrstaryna arnalǵan «Islam ǵıbadaty», «Iman negizderi», «Qajylyq pátýalary» sekildi eńbekter, sondaı-aq «Islam jáne otbasy qundylyǵy» jyly aıasynda otbasy ınstıtýtyn nyǵaıtýǵa baǵyttalǵan kitaptar oqyrman qaýymǵa usynyldy.
Jalpy alǵanda, «MUFTIYAT» baspasy tarapynan 37 ataýdaǵy kitap pen baspa ónimi jaryq kórdi. Bul eńbekter dinı tanymdy arttyrýǵa, rýhanı murany jańǵyrtýǵa jáne qoǵamnyń suranysyna saı sapaly mazmun usynýǵa baǵyttaldy. Atalǵan basylymdardyń qatarynda «Pátýalar jınaǵy» (bes tomdyq), «Ǵıbadat tutqasy. Muhtasar ál-Qýdýrı» II tomy, «Islam Entsıklopedııasy» II tomy, «Otbasylyq suraq-jaýap», «Hazireti Ábý Bákir Syddyq», «Quran injýleri», «Taýhıd – bir bútin senim», «Juma ýaǵyzy» V tom jınaqtary, balalar men jasóspirimderge arnalǵan tanymdyq eńbekter, sondaı-aq «Qazaqstan musylmandary dinı basqarmasyna 35 jyl» tarıhı jınaǵy bar.
Sonymen qatar «Rýhanı mura» jobasy aıasynda Qoja Ahmet Iasaýı, Máshhúr Júsip Kópeıuly, Káriboz Qańtaruly syndy kórnekti tulǵalardyń eńbekteri qaıta basylyp, ulttyq rýhanı qundylyqtardy keńinen nasıhattaýǵa jol ashyldy.
Bas múftı hazirettiń qatysýymen óńirlerde kitaptardyń tanystyrylymy men kórmeleri uıymdastyrylyp, Aqmola jáne Almaty oblystarynyń meshitteri aldynda juma kúnderi turaqty túrde kitap jármeńkeleri ótkizilýde.
Kitap oqý mádenıetin damytý jáne Múftııat baspasynyń qyzmetin keńinen tanytý maqsatynda 11 qarasha kúni «Jánnatpen súıinshilengen on sahaba» kitaby boıynsha respýblıkalyq baıqaý ótkizilip, jeńimpazdar aqshalaı syılyqtarmen, al ózge qatysýshylar yntalandyrý júldeleri men alǵys hattarmen marapattaldy.
