KINDIK KESÝ

Kindikti aq baltamen kesip, taza jippen baılaıdy, túbine kúl sebedi. Kindik kesken baltany ózge nársege paıdalanbaı, saqtap qoıady. Baılanǵan kindik úsh-tórt kúnde túsedi. Er balanyń kindigin yrymdap, "úı kúshik bolmasyn" dep qyrdan asyryp laqtyryp jiberedi, al qyz balanyń kindigin "úıdiń quty bolsyn" degen oımen otbasy, oshaq túbine kómedi. Sonymen qatar bala kindigin oqymysty bolsyn degen nıetpen kitap arasyna saqtap qoıatyn, at qulaǵynda oınasyn degen tilekpen attyń jalyna baılaıtyn yrymdar da bar. Tilimizdegi "kindik kesken jer", "kindik qany tamǵan jer" degen qadirli, qasıetti sózder osy dástúrge baılanysty qalyptasqan.