ÓMIRGE QAITA ÁKELGEN RAMAZAN...
Jaratqan bizdi jarylqap, shuǵylasyn shashqan tańnyń atqanyn kórýdi, ómir súrýdi násip etipti. Allanyń osyndaı sheksiz nyǵmetterin kózben kórýdi násip etkenine sheksiz shúkirlikter aıtyp, tabıǵatty tamashalaǵanǵa ne jetsin.
Jaz mezgili serýendep jaıaý júrýge óte ońtaıly mezgil bolǵandyqtan, ádettegideı jol boıyndaǵy saıabaqtardyń birine kelip, qaz-qatar tizilgen oryndyqtardyń birine jaıǵastym. Bul saıabaqtyń ashylǵanyna asa kóp ýaqyt bolmaǵandyǵy aǵashtarynyń alasalyǵynan ańǵarylyp tur. Jaıaý júrginshilerge arnalǵan joldyń boıynda bir sapqa boı túzegen aǵashtardyń ishinen kesilgen aǵashtyń oryny baıqaldy. Baıqasam jas aǵash túbinen kesilgen eken. Kesilgen aǵashtyń janynan jas shybyq boı kóterip keledi. Bozaryp atyp kele jatqan kúnniń shuǵylasy jas shybyqtyń názik japyraqtaryna qýat bergendeı jalt-jult etedi. Álgi shybyq kúnnen sheksiz qýat alyp, janyndaǵy aǵashtarǵa jetip alsam dep turǵandaı. Osy kóriniske qyzyǵa qaraǵanymdy baıqap kele jatqan beıtanys jolaýshy janyma kelip toqtady da: «Men bul jas shybyqtan ózimdi kórip turǵandaımyn», – dedi. Álgi jolaýshynyń túsiniksiz sózi meni qyzyqtyra tústi. Sol sátte tańqalysymdy ańǵarǵan beıtanys jolaýshy, áńgimesin bylaı órbitti.
– Álgi kesilgen aǵashtyń janynan ósip kele jatqan jas shybyqty kórip ózimdi sol jas shybyqtaı sezinip turmyn. Bul kesilgen aǵashtyń kólemine qarap tereń tamyr jaımaǵanyn, asa alyp aǵash bolyp úlgermegenin ańǵarasyń. Bálkim dińgegine qurt túsip qýrady ma álde qandaı da bir aýrýǵa ushyraǵandyqtan, janyndaǵylarǵa zııany tımesin dep kesip tastady ma kim bilsin? Degenmen kesilgen aǵashtyń túbinen ósip shyqqan jas shybyq, bul aǵashtyń ǵumyryn qaıta jalǵady emes pe?
Men de tulǵa bolyp qalyptasýǵa tyrystym, ósip jetilmek boldym. Alaıda, baǵytymdy durys tańdamaǵan ekenmin. Men muny ótken jyldyń Ramazan aıynda túsindim...
Aýqatty otbasynda dúnıege keldim. Esh ýaqyt qarajattan tarshylyq kórip, áleýmettik máselelerge bas qatyrmaǵan edim. Birge oqyǵan synyptastarym men joǵary oqý orynyndaǵy álsiz, jaǵdaıy tómen qurdastarymdy múldem mensinbeýshi edim. Tipti olardy adam qurly kórmegen ekenmin. Tákápparlyǵymnyń shekten shyqqany sonshalyq, qolyn sozyp amandasqysy kelgenderdiń qolyn qaǵyp, ózderin soǵyp ótken kezderim de boldy. Túski úziliste synyptastarymmen birge ashanaǵa baratynmyn, tapsyrysty artyǵymen berip asqazanym aýyrǵansha toıa jedim. Artyǵymen alǵan taǵamdardan artylyp qalyp ysyrap ettim. Artylyp qalǵanyn bile tura qasymdaǵy joldastaryma bermeýshi edim. Kókeıimde «men satyp alǵan astan nege ózgeler dám tatýy kerek, qajet bolsa ózderi satyp alsyn» deýshi edim. Er jetip, bozbala boldym. Túndeletip qydyrýdy ádetke aınaldyrdym. Nápsiniń jetegine erip arsyz áreketterge bardym. Araq-sharapty azsynyp, túrli bas aınaldyrar shópter men dárilerdi tutyndym. Birte-birte sol dárilerge táýeldilikti ańǵardym. Solaı bola tura ózimdi nápsiniń quly bolǵanymdy moıyndamadym. Ata-anamdy jıi renjitip, kóńilderin qaldyrdym. Ómirdiń men kóretin qyzyǵy qalmaǵandaı boldy, bárinen jalyqtym. Sol sátte qasıetti Ramazan aıy taıap qalǵan bolatyn. Ata-anam nıet etip aýyz bekitýimdi ótindi. Men kelistim, sebebi orazany da jańa ermek, qyzyq retinde eseptedim. Alǵash ret tańerteń sáresine oıanyp, dáret aldym, ata-anammen bir dastarhanda otyryp tańǵy sáresin ishtim. Kúni boıy ash júrgendikten bolar, aýyzashar ýaqytyn taǵatsyzdyna kúttim. Alǵash ret jaı qara sýdyń osynshalyqty dámdi bolaryn túsindim. Keshkilik aýyzashar ýaqytynda taǵy da otbasymyzben bir dastarhannyń basynda otyryp as ishtik. Sol kezde sońǵy ret qashan otbasymyzben bir dastarhannyń basynda otyrǵanymyzdy esime túsire almadym. Árqashan ata-anamdy jalǵyz qaldyryp, dostarymmen saýyq quryp ketetinmin. Ata-anammen bir dastarhanda otyryp tamaqtanýdy balanyń isi dep sanaıtyn kezderim esime túsip, qatty uıaldym, basym tómen túsip, júzderine qaraýǵa bata almadym. Ishteı «anashym, áketaıym keshirińdershi» deýmen boldym. Sol kúnnen bastap árbir aýyzashar keshinde óz úıimde ata-anammen birge as ishtim, birte-birte úıimniń berekesin keltirgendeı boldym. Aǵaıyn-týys, dos-jarandar meni aýyzasharǵa shaqyryp, qonaq etti. Kópten hal suraspaǵan týystarymnyń qolyn alyp, janashyrlyǵyn sezindim. Dastarhan basynan qartaıǵan ata-ájelerimizdi kórip, jastaryna qaramaı aýyz bekitip, saýap jınap júgenin kórip úlgi tuttym. Ornymen aıtylǵan ulaǵatty áńgimelerin esitip, ǵıbrat aldym.
Otyz kún orazada balaǵat sózderden aýzymdy, jıirkenishti kórinisterden kózimdi, arsyz nápsiden ózimdi tyıdym. Bir qalypty tamaqtanǵandyqtan bolar artyq salmaqtan arylyp, tula boıym tazarǵandaı boldy. Ilgeri óz jasymnan áldeqaıda úlken kórinýshi edim, al oraza ýaqytynda symbatymdy qaıta qalpyna keltirip, boı túzedim. Shyndyǵynda boıymda kúsh-qýat, ómirge degen mahabbat, alǵa júrsem degen talpynys paıda boldy. Aýyz bekite júrip, isherge as tappaı qınalǵan jandardyń halin túsindim, táýbeme keldim. Mine osylaı men de álgi jas shybyqtaı ómirge qaıta keldim, – dep áńgimesin támamdady.
Rasynda Ramazan aıy – Alla Taǵalannyń musylman qaýymyna jasaǵan uly tartýy. Pendelik áreketterden arylyp, barynsha rýhanı kemeldenetin, iship-jeýden ýaqytsha tyıylyp, nápsisin júgendeıtin múbárak aı. Aılardyń eń qaıyrlysy, ýaqyttyń eń qasıettisi. Pendeniń shyn yqylaspen táýbege kelip, Jaratqanǵa qaıta bet burý aıy. Jyl boıy kir shalyp, tot basýǵa shaq qalǵan júrekti tazartatyn rahman aıy.
Alla barsha musylman qaýymynyń jasaǵan qulshylyǵyn qabyl, ustaǵan orazalaryn saýaptan jazsyn.
Serikbaeva Gúlmıra Imanalyqyzy,
Astana qalasy ákimdigi, Din problemalaryn
zertteý ortalyǵynyń mamany
