ÓZIN DE, ÓZGENI DE QINAMAITYN QASIET

22 aqpan 2023 2636 0
Оqý rejımi

Qoǵamda meıirim men qamqorlyq azaıyp, adamnyń kemshiligin kórý, al jaqsy jaǵy bolsa, kórealmaýshylyq týyndaǵan zaman boldy.

Bizdiń qoǵam meıirimge zárý. Qazirgi ýaqytta, bir-birine kóńili tolmaǵan adamdar men birin-biri kóre almaıtyn baýyrlar kóbeıdi. Biz baýyrymyzdyń qýanyshyna qýanyp, qaıǵysyna birge qaıǵyra almaımyz. Bunyń barlyǵy derlik qazirgi qoǵamnyń derti.

Bireý bizge kemshiligimizdi aıtsa, ony túzeýge tyryspaı, kisiniń kemshiligin izdeımiz. Ony da uıaltýǵa, ony da yńǵaısyz jaǵdaıǵa qaldyrýǵa tyrysamyz. Ózge adamnyń boıyndaǵy kemshilikterdi baıqamaıtyn qasıet – «taǵafýl» dep atalady. Bul qasıetti ıelenýge kóp adam talpynǵanda qoǵamnyń deńgeıi ósip, az da bolsa damı túsetin edi.

 «Taǵafýl» degenimiz – adamnyń keıbir qatelikterin kóre tura, bile tura jáne odan habardar bola tura, ol nárseden ózin beıqam jáne habarsyz sekildi kórsetý degendi bildiredi. Ǵulama Ibn ál-Jaýzı (Alla ony rahymyna bólesin) bylaı deıdi:

«Taǵafýl, ıaǵnı jaqyndaryńnyń keıbir qatelikterin ótkizip jiberý, keshire salý – adamnyń abyroı, dárejesin kóteretin kórkem minezdiń kórinisi. Jer betindegi adamdardyń barlyǵy qatelesedi. Jaza baspaıtyn pende joq. Eger adam munyń barlyǵyna shuqshıyp, árkimnen bir min izdep, qazbalaı berse, ózin de, ózgelerdi de tıtyqtatyp bitiredi. Al aqyldy adam otbasy, jaqyn-juraǵatyna qatysty keıbir máselelerde úndemeı qalýǵa tyrysady».

Sondyqtan ımam Ahmad: «Kórkem minezdiń toqsan paıyzy taǵafýlda jatyr», - degen. («Tahzıb ál-kámál» 19/370)

Bul álem nege muqtaj?

Bul álem túsinistikpen qaraýǵa, keshirimge, meıirimge muqtaj…

Túsinbestikten qanshama baılanystar úzildi. Ózin bireýdiń ornyna qoıyp kórýge tyryspaǵannan qanshama jobalar aıaqsyz qaldy.

Keshire almaýdan qanshama myqtylar birige almaı jatyr, qanshama jastardyń joly ashylmaı qaldy.

Qandaı da bir qoǵamda ózara meıirim, ózara járdem bolmasa eshqashan alǵa jyljymaıdy...

Alla Taǵala barshamyzdy meıirimdi, baýyrmal, qamqor quldarynan etkeı!

Azamat AKTANOV,

"Áljan ana" meshitiniń naıb ımamy

Pіkіrler Kіrý