TÁÝBE – QAITÝ DEGEN MAǴYNANY BILDIREDI

Táýbe – qaıtý degen maǵynany bildiredi. Iá, qaıtý. Qudaıdyń izgilik jolyna qaıtý. Ózińniń taza qalpyńa, saf rýhyńa qaıtý.

Ásilinde, kúná ataýly Alladan alystap, baılanys álsiregende  jasalady. Endeshe táýbe, Qudaıǵa baılanǵan altyn qazyǵyńa qaıta oralý.

Adam barynsha ádeıi kúná jasamaýǵa tyrysýy tıis. Biraq álsizdik tanytyp, kúná men qatelikke urynýy onyń tabıǵy bolmysy. Bir hadıste: “Sender múlde kúná jasamaıtyn bolǵandaryńda Alla senderdi ketirip, oryndaryńa kúná jasaıtyn basqa bir qaýymdy ákeler edi. Olar kúnálaryna keshirim surap, táýbe etedi. Alla da olardy keshiredi.” delingen.

Iá, Allanyń múlde qatelik jasamaıtyn, kúná ataýlydan qorǵalǵan perishte tárizdi pák jaratylysy onsyz da bar. Allaǵa kúnáǵa urynsa da, qatesine ókinip, kemshiligine keshirim surap, táýbe etetin adam sııaqty jaratylys kerek. Sebebi Allanyń “Razzaq” esimi ryzyq berýdi, “Jaratýshy” esimi jaratýdy qalaǵany sekildi, asa keshirimdi delingen “Ǵaffar” esimi de keshirgendi qalaıdy. Qate men kúná joq bolsa, Qudaıdyń “Ǵaffar” esimi de kórinis tappaq emes. Sondyqtan qatelik jasaýǵa beıim adam jaratylǵan.  Joǵarydaǵy hadıstiń mánisi de osy.

Qysqasy adam pende. Keıde artyq ketip súrinemiz, keıde kem ketip múdiremiz. Endi  birde álsizdik tanytyp, jańylsaq, basqa bir ýaqytta sabyrymyz sarqylyp  qatelikke urynamyz. Qysqasy pendeligimiz syr beredi de turady.

Mundaıda adam óz qatesin moıyndap, kúnási úshin shyn ókinip, Qudaıdan keshirim surap, aqıqı táýbege kelýi kerek. Jasaǵan kúnási kisi aqysyna qatysty bolsa, áýeli olardyń razylyǵyn alýy paryz. Sebebi kisi aqysyn ıesi keshirmeıinshe Qudaı da keshirmek emes. Bul ómirlik óte mańyzdy qaǵıda.

Shynaıy táýbesi jasalǵan kúná – tramplın ispettes adamdy  rýhanı jetildirip, Allaǵa burynǵydan da jaqandata túsedi. Qazirginiń tilimen aıtqanda táýbe arqyly mınýsty plıýske aınaldyrýymyz qajet. Bul turǵyda ázireti Álı: “Adamdy ókindirip, shynaıy táýbege ákeletin kúná is tákapparlyqqa ıtermeleıtin myń ıgi isten álde qaıda qaıyrly” degen.

Qaırat JOLDYBAI