Abaı mereıtoıyna arnalǵan Esse baıqaýy ótti (FOTO)

Almaty qalasy ókildiginiń uıymdastyrýymen QMDB-nyń 30 jyldyq mereıtoıy men Abaı Qunanbaıulynyń 175 jyldyǵyna oraı «Allanyń ózi de ras, sózi de ras» atty uly aqynnyń shyǵarmalaryn dinı-tanymdyq turǵyda taldap, Esse jazý boıynsha shyǵarmashylyq baıqaý ótti.   

Baıqaýda Abaı shyǵarmalarynan rýhanı nár alyp júrgen qyryqqa jýyq Almaty qalasynyń talantty jastary Esselerin joldap, ózara baq synady. Sondaı-aq atalmysh baıqaýǵa kelip túsken Esselerdi fılologııa ǵylymdarynyń doktory Qanıpash Mádibaeva, fılologııa ǵylymdarynyń kandıdattary Serikqazy Qorabaı, Tóráli Qydyr jáne QMDB Ǵulamalar keńesiniń múshesi Baýyrjan Álıuly oqyp shyǵyp, laıyqty baǵa berdi.

«Taýgúl» meshitinde ótken shyǵarmashylyq baıqaýdy osy meshittiń bas ımamy Ernar Májen júrgizip otyrdy. Uly aqynnyń mereıtoıyna arnalǵan baıqaýdy Áýezov aýdanynyń bas ımamy Bahtııar qarı Qasymalıev Quran oqyp ashyp berdi.

Eń aldymen Almaty qalasynyń bas ımamy Erkinbek Shoqaıǵa arnaıy sóz berildi. Bas ımam óz sózinde baıqaýǵa qatysýshalar men qazylar alqasyna, kórermenderge QMDB Tóraǵasy, Bas múftı Naýryzbaı qajy Taǵanuly hazrettiń ystyq sálemin jetkizip, Abaı Qunanbaıulynyń 175 jyldyq mereıtoıymen quttyqtady. Sonymen qatar búgingi shyǵarmashylyq baıqaýdyń mańyzdylyǵy men paıdasyna toqtalyp, Abaıdyń ıslam men ıman qundylyqtaryn jyrlaýdaǵy ornyn aıtty. Sońynda baıqaýdy uıymdastyrǵan Áýezov aýdany meshitteri men qazylar alqasyna alǵys bildirip, qatysýshylarǵa sáttilik tiledi. 

Odan keıin quttyqtaý sóz Áýezov aýdany ákiminiń orynbasary Dastan Qaıratulyna berildi. Ol qala jastarynyń Abaı shyǵarmalarynan úlgi alyp, kitap oqýǵa, shyǵarmashylyqpen aınalysýǵa beıimdiligin aıtyp, óz rızashylyǵyn jetkizdi.

Baıqaý barysynda S.Asfendııarov atyndaǵy Qazaq ulttyq medıtsınalyq ýnıversıtetiniń stýdentteri Arman Muratov «Abaıdy oqy, erinbe!» jáne Baýyrjan Myrzahmet «Atamnyń ósıeti» atty Esselerin ortaǵa shyǵyp oqyp berdi.   

Óz kezeginde qazylar alqasy da baıqaýǵa kelip túsken Esseler boıynsha ózderiniń synı pikirlerin aıtyp, jaqsy jazylǵan shyǵarmalardy oń baǵalady, bolashaq abaıtanýshylarǵa sáttilik tiledi. Sońynda ortaǵa shyǵyp qorytynda pikir aıtqan fılologııa ǵylymynyń kandıdaty Tóráli Qydyr baıqaýdyń mańyzdylyǵy týraly sóz qozǵap, dindegi ıhsan máselesi men Abaıdyń tolyq adam ilimin tilge tıek etti.

Qazylar alqasynyń ádil sheshimimen baıqaýdyń jeńimpazdary anyqtalyp, júldegerlerge qarjylaı syılyq pen marapattar tabystaldy. I oryn (200 000 tg) S.Asfendııarov atyndaǵy Qazaq ulttyq medıtsınalyq ýnıversıtetiniń 7-kýrs stýdenti Myrzahmet Baýyrjanǵa berildi. II oryn (100 000 tg) S.Asfendııarov atyndaǵy Qazaq ulttyq medıtsınalyq ýnıversıtetiniń 6-kýrs stýdenti Muratov Armanǵa tabystaldy. III oryn (50 000 tg) Abaı atyndaǵy Qazaq ulttyq pedagogıkalyq ýnıversıtetiniń túlegi Babaı Jazıraǵa buıyrdy. Sondaı-aq Bereket Baısalbaev, Aıda Qasymova, Mıras Amangeldi, Aınur Polatova, Melıke Chakroglýnyń Esseleri de jaqsy baǵalanyp, yntalandyrý syılyǵyna laıyq dep tanyldy. Árbir yntalandyrý syılyq ıegerine kitaptar tartý etildi.

Aıta ketetin jaıt, Abaı Qunanbaıulynyń 175 jyldyǵyna oraı uıymdastyrylǵan baıqaý Azan.kz saıty men Áýezov aýdandyq «Aqsaı» meshitiniń Youtube kanaldary men instagramm áleýmettik jeli paraqshalarynda tikileı Efırde kórsetildi.