«Áziret Sultan» meshiti 350 balany mektepke daıyndady (FOTO)

Búgin, qasıetti juma respýblıkalyq «Áziret Sultan» meshiti jyldaǵy úrdis boıynsha «Mektepke jol» qaıyrymdylyq aktsııasyn ótkizip, muqtaj otbasylar balasyn jańa oqý jylyna daıyndady. Meshit ashylǵaly beri ótkizilip kele jatqan aktsııa aıasynda bıylǵy jyly 350 oqýshyǵa mektep formasyna qajetti qarajat pen qural-jabdyqtar toltyrylǵan sómkeler tartý etildi. Bas meshittegi qaıyrymdylyq aktsııasyna «Ýaqyp» qory da óz úlesin qosyp, 100 oqýshyǵa mektep sómkesin syılap otyr.

Qasıetti juma kúnine tuspa-tus kelgen ıgi sharaǵa QMDB tóraǵasy, Bas múftı Serikbaı qajy Oraz qatysyp, búldirshinderge aq batasyn berip, syılyqtardy óz qolymen tabys etti. Sondaı-aq, «Ýaqyp» korporatıvtik qaıyrymdylyq qorynyń prezıdenti Qaırat Aıtbaı myrza da oqýshylarǵa aq jol tilep, búgingi sharanyń mán-mańyzyn arttyra tústi.

Aıta keteıik, búginde bul shara buqaralyq sıpat alyp, «Mektepke jol» ataýymen elimizdiń túkpir-túkpirinde uıymdastyrylyp keledi. Bıylǵy jyly óńirdegi ókildikterdiń uıymdastyrýymen aktsııa aıasynda 5000-nan astam oqýshyǵa mektep formasy men sómke toly qural-jabdyqtar tartý etilip, qýanysh syılandy.