BAS MÚFTI ShEIH SÝRÝR BEN MUHAMMED ÁL-NAHAIaNMEN KEZDESTI (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Astana qalasyndaǵy Bas meshitte Abý Dabı Ámirligin bıleýshi áýlettiń ókili, sheıh Sýrýr ben Muhammed ál-Nahaıanmen kezdesti.
Aldymen mártebeli meımandar juma namazyna qatysty. Budan keıin Bas múftı elimizge memlekettik saparmen kelgen qurmetti qonaqqa meshit ishin aralatyp, jumysyn tanystyrdy. Sondaı-aq kezdesýge BAÁ-niń Qazaqstandaǵy Tótenshe jáne ókiletti elshisi Muhamed Saıd Muhamed ál-Arıkı men osy memlekettegi Qazaqstan elshisi Madııar Smádiluly qatysty.
Bas múftı sheıh Sýrýr ben Muhammed ál-Nahaıanǵa Bas meshittiń ózge qulshylyq úılerden ereksheligi jaıly áńgimelep berdi. Sonymen qatar din men dástúr sabaqtastyǵyn dáripteý, jamaǵattyń rýhanı suranysyn qanaǵattandyrý, Islam dinin zamanaýı tásilmen nasıhattaý, jamaǵat arasynda qazaq halqynyń ulttyq qundylyqtaryn dáripteý baǵytynda atqarylyp jatqan jumystar jaıly sóz etti. Óz kezeginde Abý Dabı Ámirligin bıleýshi áýlettiń ókili Bas múftıge qonaqjaılyǵy úshin alǵysyn bildirip, záýlim meshitten erekshe áser alǵanyn jetkizdi.
