Kelisim bar jerde keleshek bar

18 qazan 2021 3443 0
Оqý rejımi

Asa qamqor, erekshe meıirimdi Allanyń atymen bastaımyn!

Tekti atalardan ǵasyrdan ǵasyrǵa jalǵasqan, tálim men tárbıeniń bastaýy bolǵan asyl dinimiz Islam birlik pen beıbitshilikke úndeıdi. Islam sózi beıbitshilik degen maǵynany bildiredi. Isi musylman balasy baýyryna sálem bergen sátte «Ássálamý aleıkým» dep, Alladan beıbitshilik pen amandyq tilep amandasady. Osy rette barshańyzǵa musylmannyń sálemdesý ádebimen «Ássálamý aleıkým» deımin. Sizderge Alladan amandyq, bereke men birlik tileımin.

Haq Taǵala qasıetti Quran Kárimniń «Hýjýrat» súresiniń 13-aıatynda: «Eı, adamdar! Negizinde, Biz senderdi bir er jáne bir áıelden jarattyq, ári senderdi bir-birlerińdi tanyp, bilýleriń úshin halyqtar men rýlar etip jasadyq. Anyǵynda, Allanyń aldyndaǵy senderdiń eń qurmettileriń – taqýalaryń», – deıdi.

Biz bul aıattan búkil adamzat balasynyń ulttar bolyp bir-birinen erekshelenip jaratylýy Jaratýshy Jabbar Iemizdiń danalyǵy, meıirimi men nyǵmeti ekenin túsinemiz.

Kúlli ómiri adamzat balasyna ónege bolǵan ardaqty Paıǵambarymyz Muhammed (oǵan Allanyń salaýaty men sálemi bolsyn) alǵashqy amalyn musylman úmbetin baýyrlastyrýdan, qasıetti Mádınada qonystanǵan rý men taıpalardy tatýlastyrýdan bastaǵan. Osylaısha birlik pen baýyrmaldyq sıpattyń negizinde Islam dininiń irgetasy qalandy.

Haq Elshisi (oǵan Allanyń salaýaty men sálemi bolsyn) beıbit jolmen qasıetti Mekke qalasyn alǵanda basqa senimdegi halyqtyń dinı rásimderine qurmetpen qaraǵan. Bul – kez-kelgen basshy men kez-kelgen salaǵa jaýapty adam úshin óshpes ónege, sarqylmas sabaq dep atar edik. Alla Elshisiniń ónegeli isi basqarý isindegi barlyq adamǵa úlgi bola bermek.

Elimizde Elbasy Nursultan Nazarbaevtyń bastamasymen 18 qazan «Rýhanı kelisim» kúni retinde bekitilip, osy dataǵa mańyz berilip jatqan jaıttyń da ózindik aıryqsha máni bar. Óıtkeni, rýhanı kelisimsiz keleshek joq.

Qazaqstannyń Tuńǵysh Prezıdenti – Elbasy Nursultan Nazarbaev bir sózinde: «Halyqtardy bir-birinen bóletin teńizder emes, nadandyq pen tilderdiń bólektigi de emes, arazdyq qana. Dostyq joq jerde arazdyqqa múmkindik mol bolmaq» degen edi.

Allaǵa shúkir, búginde Eýrazııa júreginde beıbit ǵumyr keship kele jatqan Qazaqstan tórtkúl dúnıege bitimger, araaǵaıyn, ymyrashyl irgeli el retinde tanyldy. Elimizdiń rýhanı birligin nyǵaıtýǵa Qazaqstan musylmandary dinı basqarmasy da súbeli úles qosyp keledi.

Orys pravoslavıe shirkeýiniń Qazaqstan jáne Astana mıtropolıti Aleksandr elimizdegi musylman qaýymyn jyl saıyn Qurban aıt merekesimen quttyqtaıdy. Men de óz tarapymnan pravoslav senimindegi hrıstıandardy Rojdestvo merekesimen quttyqtap, arnaıy hat joldaımyn. Óıtkeni, órkenıetti elderdegi dinderaralyq tatýlyqtyń qalyptasýy – asa mańyzdy is. Musylmannyń ulyq meıramy – Qurban aıt kúni, sonymen qatar Rojdestvo merekesi kúni resmı demalys retinde jarııalanýy mańyzdy sheshimniń biri bolǵany anyq.   

Qudaıǵa shúkir, bizdiń elde dástúrli dinder arasyndaǵy ózara kelisim joǵary deńgeıde kórinis tapqan. Din qaıratkerleriniń basyn qosyp, barsha halyqty dinı tatýlyq pen turaqtylyqqa úndegen eńseli elordamyz rýhanı kelisim men birliktiń sımvolyna aınaldy. Saryarqa tósinde ótetin dástúrli sezder dinder arasyndaǵy dıalogty damytýǵa súbeli úles qosýda. Elbasynyń bul bastamasy hákim Abaıdyń: «Birińdi qazaq biriń dos, kórmeseń istiń bári bos», – degen sózin ǵalamdyq bıikke kóterdi.

Memleket basshysy Qasym-Jomart Kemeluly bıylǵy Joldaýynda: «Qoǵamdaǵy birlik pen kelisimdi kózdiń qarashyǵyndaı saqtaýymyz kerek. Etnosaralyq jáne konfessııaaralyq qatynastyń qanshalyqty mańyzdy ekenin barlyq azamatymyz túsiný qajet. Biz qashan da alaýyzdyqqa qarsy tura bilgen elmiz» dep atap ótti.

Rasynda, qazaq kóshin bastaǵan keshegi han-sultandarymyz el basqarý isin eń áýeli ultty yntymaqqa uıystyrdy. Babalarymyzdyń búgingi urpaǵy retinde barshamyz birligimizdi bekem etýge úles qosýymyz tıis dep sanaımyz.

Alla Taǵala halqymyzǵa amandyq, jurtymyzǵa tynyshtyq, kúlli adamzat balasyna yntymaq násip etkeı. Ámın!

Naýryzbaı qajy TAǴANULY,Qazaqstan musylmandary dinı

basqarmasynyń tóraǵasy, Bas múftı 

Pіkіrler Kіrý