MEMLEKETTIK KEŃESShI IMAMDAR FORÝMYNA QATYSTY (FOTO)

Búgin Astana qalasynda «Imam – izgi qoǵam jarshysy» taqyrybynda uıymdastyrylǵan V respýblıkalyq ımamdar forýmyna Qazaqstan Respýblıkasynyń Memlekettik keńesshisi Erlan Qarın arnaıy qatysty.

Qazaqstan musylmandary dinı basqarmasynyń uıymdastyrýymen ótken forýmda Erlan Tynymbaıuly qoǵamdaǵy ımamdardyń rólin aıryqsha atap ótti.

«Imam – halyqty birlikke úndeıtin, qoǵamdy meıirimdilikke shaqyratyn tulǵa. Adamdardyń kókiregine izgiliktiń dánin seýip, jurtshylyqty jaqsylyqqa nasıhattaıdy. Sondyqtan ımamdardyń el ishindegi orny erekshe. Soǵan sáıkes, olarǵa artylatyn jaýapkershilik te zor.

Imam men jamaǵattyń arasynda ózara túsinistik, yntymaq pen qurmet bolsa, onda qoǵamnyń turaqtylyǵy da bekı túsedi. Jurt arasynda júrgende ımamdarmen jıi jolyǵysyp jatamyz. Sol kezde «Jamaǵatyńyz qalaı?» degen suraq qoıamyz. Sonda baıqaǵanym, búginde ımamdar jamaǵattary jaıynda aıtqanda erekshe meıirlenip ketedi. Meshitke kelýshilerdiń bir-birine kómek qolyn sozyp jatqanyn, súringendi demeıtin yntymaǵy bar ekenin aıtady.

Bul el birliginde jańa irgetas qalyptasyp jatqanyn kórsetedi. Halyqtyń bir-birine sharapatyn tıgizip, aýyzbirshilikte ómir súrip jatqanyn naqtylaıdy. Osyǵan qarap, Múftııat pen ımamdardyń jumysy tabysty iske asyp jatqanyna kýá bolamyz» dedi Memlekettik keńesshi.