MÚFTIIaT ATYNAN QAZAQSTANDYQ QAJYLARDYŃ QURMETINE ARNAIY DASTARQAN JAIYLDY
Qazaqstan musylmandary dinı basqarmasynyń uıymdastyrýymen qasıetti Mekke qalasynda qazaqstandyq qajylardyń qurmetine arnaıy dastarhan jaıylyp, saltanatty qabyldaý rásimi ótti.
Taǵylymdy jıyn qasıetti Quran Kárim aıattarynyń oqylýymen bastalyp, jamaǵattyń birligi men yntymaǵyn aıshyqtaǵan rýhanı basqosýǵa ulasty.
Is-sharaǵa Qazaqstan qajylyq mıssııasynyń tóraǵasy Kenjetaı Baıkemeluly, Qazaqstan Respýblıkasynyń Saýd Arabııasy Koroldigindegi Tótenshe jáne Ókiletti Elshisi Madııar Meńlibekov, Qazaqstannyń Jıdda qalasyndaǵy Bas konsýly Rýslan Qospanov, qazaqstandyq qajylarǵa qyzmet kórsetetin «Mashariq» kompanııasynyń basqarma tóraǵasy Muhammed Andergırı, Qajylyq mıssııasynyń músheleri, elimizden kelgen 14 qajylyq kompanııasynyń jetekshileri, ýaǵyz-nasıhat qyzmetine jaýapty ımamdar, dárigerler jáne otandas qajylar qatysty.
Jıynda sóz sóılegen Qajylyq mıssııasynyń tóraǵasy Kenjetaı Baıkemeluly Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanulynyń júrekjardy sálemi men aq batasyn jetkizdi. Sonymen qatar qajylyqtyń adam rýhanııatyn kemeldendirýdegi ornyna toqtalyp, qasıetti sapardyń tárbıelik jáne taǵylymdyq máni týraly keńinen nasıhat aıtty.
Óz kezeginde Qazaqstan Respýblıkasynyń Saýd Arabııasy Koroldigindegi Tótenshe jáne Ókiletti Elshisi Madııar Meńlibekov sóz sóılep, otandastarymyzǵa sátti qajylyq tilep, qos memleket arasyndaǵy dostyq pen yntymaqtastyqtyń mańyzyn atap ótti. Elshi qajylardyń amandyǵy men saparlarynyń qabyl bolýyna tilektestik bildirdi.
Rýhanı kesh barysynda qazaqstandyq qajylardyń qaýipsizdigi men jaıly qulshylyq jasaýy úshin atqarylyp jatqan jumystarǵa erekshe nazar aýdarylyp, Qazaqstan qajylyq mıssııasynyń qyzmeti men qajylarǵa kórsetilip jatqan qoldaý sharalary jóninde aqparat berildi.
Is-shara sońynda qonaqtar Saýd Arabııasy Koroldigi Qajylyq jáne umra mınıstrliginiń uıymdastyrýymen ázirlengen arnaıy kórmeni tamashalady. Kórmede qajylyqtyń baı tarıhy, qasıetti Mekke shaharynyń ótkeni men búgini, sondaı-aq adamzattyń ardaqty tulǵasy – Paıǵambarymyz Muhammedtiń (oǵan Allanyń salaýaty men sálemi bolsyn) ónegeli ómir joly zamanaýı tehnologııalar arqyly kórermen nazaryna usynyldy.
Taǵylymdy basqosý qajylardyń rýhanı jigerin arttyryp, qasıetti sapardyń mánin tereń sezinýge múmkindik bergen erekshe rýhanı kesh retinde este qaldy.
