Naýryzbaı qajy Taǵanuly halyqaralyq konferentsııada baıandama jasady (FOTO)
QMDB Tóraǵasy, Bas múftı Naýryzbaı qajy Taǵanuly Tarazda ótip jatqan Atlah shaıqasynyń 1270 jyldyǵyna arnalǵan ǵylymı-tanymdyq halyqaralyq konferentsııa barysynda «Atlah shaıqasy –halqymyzdyń haq dinge bet-burysyndaǵy bıik belesi» taqyrybynda baıandama jasady.
Bas múftı aımaq basshysy Berdibek Máshbekulyna, Ózbekstan musylmandary dinı basqarmasy Tóraǵasynyń orynbasary Homıdjan Ishmanbetovke, ujymyna, Qyrǵyzstan musylmandary dinı basqarmasynyń Apparat basshysy Ravshan Tashbolatulyna, Nur-Múbarak ýnıversıtetiniń rektory ásh-Shahhat ál-Jındıge jáne basqa da jıynǵa qatysyp otyrǵan ǵalymdar men din qaıratkerlerine alǵys aıtty.
«Búgingi óskeleń urpaq ókilderi halqymyzdyń ótkenine muqııat zer salsa, tolǵaýy toqsan tarlan tarıhymyzdan mol ónege alatyny haq. Iá, Allanyń quly, Muhammedtiń (oǵan Allanyń salaýaty men sálemi bolsyn) úmbeti bolǵan Alash jurty ótken tarıhyna nazar aýdarsa, enjarlyq pen erliktiń, qorqaqtyq pen batyrlyqtyń, artta qalý men oıanýdyń, kertartpalyq pen kemeńgerliktiń, qadymshyldyq pen aǵartýshylyqtyń, ydyraý men birigýdiń, ymyrasyzdyq pen yntymaqtastyqtyń, bulǵaq pen birtutastyqtyń, adaldyq pen opasyzdyqtyń, kúıinish pen súıinishtiń, qasiret pen qýanyshtyń, kiriptarlyq pen erkindiktiń, táýeldilik pen egemendiktiń, dinsizdik pen dindarlyqtyń mán-maǵynasyn tolyqtaı uǵyna alatyny talassyz aqıqat. Al tarıhtan tálim alý úshin ótken kúnderdiń enshisindegi aıtýly oqıǵalar, surapyl jyldar men kúrkireýik soǵystar, el esindegi jahut jaǵdaıattar men izgi jańalyqtar men ilkimdi oı-tujyrymdar árdaıym atalyp ótilýi tıis. Muqym musylman úmbeti úshin sondaı aıtýly oqıǵa, atap ótpeý eldigimizge syn bolatyn dańqty datanyń biri – bıyl oryn alǵanyna 1270 jyl tolǵan «Talas ǵazaýaty» ekeni kúmánsiz shyndyq» deı kele tarıhı oqıǵalarǵa toqtalyp, Atlah shaıqasynan keıin ortaǵa shyqqan oń nátıjelerdiń 7 baǵytyn tizbektedi.
«Islamnyń beıbit túrde nasıhattalýynyń nátıjesinde halyq haq dindi keń arnada qabyldap qana qoıǵan joq, túrkilerdiń ishinen kóptegen din ǵulamalary shyǵa bastady. Qarahan dáýirinde Marǵınanı, Dabýsı, Sarahsı, Bázdaýı, Matýrıdı, Násafı syndy fıqh jáne mýtakállım ǵalymdary boı kórsetti. Ahlaq iliminiń nasıhattaýshylary Júsip Hamadanı, Arystan bab, Abdýlhalyq Ǵyjdýanı, Ahmet Iasaýı, Súleımen Baqyrǵanı, Nájmıdden Kýbra, Zeńgi ata, Uzyn Hasan ata t.b. shaıqylar halyqtyń ar-ujdanyna qyzmet etti. Toqsan aýyz sózdiń tobyqtaı túıini – óz basym 751 jylǵy «Atlah shaıqasyn» halqymyzdyń Haq dinge bet burysyndaǵy bıik belesi dep esepteımin» dep atap ótti.
Sondaı-aq Bas múftı el táýelsizdiginiń 30 jyldyǵy qarsańynda osyndaı alqaly jıynǵa qoldaý kórsetken Jambyl oblysy ákimdigine rııasyz raqmetin aıtty.
