QMDB: «Tápsirlerdiń tańdaýlysy» tórt tomdyq kitaby jaryq kórdi (FOTO)
Búgin elordasy Nur-Sultan qalasyndaǵy Ulttyq akademııalyq kitaphanada Bas múftı Naýryzbaı qajy Taǵanulynyń jetekshiligimen qazaq jáne orys tilderinde shyqqan «Tápsirlerdiń tańdaýlysy» tórt tomdyq kitabynyń tanytymy ótti.
Is-sharaǵa Aqparat jáne qoǵamdyq damý vıtse-mınıstri Marat Ázilhanov, QMDB tóraǵasy, Bas múftı Naýryzbaı qajy Taǵanuly, memleket jáne qoǵam qaıratkerleri – Myrzataı Joldasbekov, Ǵarıfolla Esim, Oralbaı Ábdikárimov, Halyq qaharmany Baqytjan Ertaev, Nur-Múbárak Islam mádenıeti ýnıversıtetiniń rektory Muhammad ash-Shahhat ál-Jındı, sondaı-aq Senat depýtattary Nurtóre Júsip pen Dana Nurjigit, Dinı basqarmanyń bólim basshylary men oblys ımamdary qatysty.
Igi is-shara qasıetti Quran oqýmen bastalsa, Bas múftı Naýryzbaı qajy Taǵanuly jıynǵa qatysýshylardy el Táýelsizdiginiń 30 jyldyǵymen quttyqtap, izgi tilegin, alǵysyn bildirdi
«Táýbeniń zory – Táýelsizdik» degen sóz bar. Ulan-ǵaıyr dalamyzda asyl dinimizdiń qanat jaıyp, ǵulamalardyń, bilimdi azamattardyń shyǵýy, osyndaı eńbekterdiń jaryq kórýi – táýelsizdiktiń arqasy. Sırııanyń Aleppo qalasynan shyqqan Muhammed Álı ás-Sabýnıdiń áıgili «Safýatát-táfásır» tápsir kitaby qazaq jáne orys tilinde jaryq kórip otyr. Tórt tomnan turatyn bul eńbekti shyǵarýdaǵy maqsatymyz – qasıetti Quran aıattaryn halyqqa durys tápsirleý, halyqqa Ábý Hanıfa mázhabyn ustanýdyń mańyzdylyǵyn dáripteý, jastarǵa durys dinı málimet berý, elimizde din tutastyǵyn qalyptastyrý, destrýktıvti dinı aǵymdardyń ıdeologııasyna toıtarys berý. Qazaq jáne orys tilinde jazylǵan tápsir kitaby oqyrmanǵa jeńil, yqshamdy berilýimen erekshelenedi.
Ǵasyrlar boıy Qurannyń kóptegen tápsirleri jaryq kórse de, sonyń ishinde arab elderimen qatar Orta Azııada keń taraǵan «Safýat át-táfásır» kitabynyń orny erekshe. Qundy eńbekte Quran Kárim aıattarynyń maǵynasy men negizgi máni túsinikti tilmen jazylyp, áhli súnnet ǵalymdarynyń kózqarasy berildi. Sonymen qatar, kitapta «Safýat át-táfásır» eńbegin negizge ala otyryp, qabyldaýǵa, túsinýge kúrdeli aıattarǵa Hanafı mázhaby, Matýrıdı senimine sáıkes qosymsha túsindermeler berildi. Arapsha sózderge leksıkalyq taldaýlar jasaldy. Aıattardyń bir-birimen baılanysy men syry ashyldy dep aıta alamyz. Aıattardyń túsý sebebi, tarıhy, Allanyń sózdi qoldanýdaǵy sheberligi tápsirlendi.
Bul eńbek bilim men ǵylymǵa qushtar jandarǵa jol kórseter baǵdarsham, jastarymyzdyń Otanǵa degen súıispenshilik qasıetterin arttyrýǵa, azamattarymyzdyń dinı turǵydan saýatty bolýyna, olardyń jat aǵymdardyń jeteginde ketpeýine, Quran tápsirin durys túsinýine, dástúrge qarsy shyqpaýyna, din tutastyǵyn saqtaýyna, elimizdiń rámizderine qurmet kórsetýine, qoǵamda qalyptasqan konfessııaaralyq tatýlyqty nyǵaıtýǵa oń yqpal etpek», – dedi Bas múftı.
Jıynnyń qurmetti qonaqtary, el aǵalary Dinı basqarmanyń ıgi bastamalaryna sáttilik tilep, jyly lebizderin bildirdi jáne qundy eńbektiń jaryq kórýimen quttyqtady.
