«Ғылмани» мешітінің ақсақал шәкірті өнегелі шара өткізді (ФОТО)

05 желтоқсан 2019 4605 0
Оқу режимі

«Сәдуақас қажы Ғылмани» мешітінде діни курстан жыл бойы дәріс алып жатқан ақсақал Танабай Әбділдаұлы игі іске мұрындық болды.

 ҚМДБ басты бағыттарының бірі оқу-ағарту жұмысы. Бұл ретте «С.Ғылмани» мешітінің елордадағы тарихи мешіт ретінде де алар орны еркеше. Жамағаты мол, шәкірттері белсенді мешіттердің бірі. Тарихи мешіт болғандықтан да бұл мешітте басқа мешіттерден қарағанда ақсақалды шәкірттер көптеп білім алуда. Сондай шәкірттердің бірі – білікті инженер болған, зейнеткер, бұл күнде сексенің сеңгіріне аяқ басқан Танабай ақсақал Атырау қаласына қоныс аударуына байланысты, көп жылдар бойы жамағат болып, діни білім алған мешітінде  дастарқан жайып, ұстаздары және дәрістес ақсақалдардың батасын алды.

Аталмыш шараға бас имам Бауыржан Есмахан және барша имамдар мен ұстаздар қатысты. Сондай-ақ бас имам ақсақалға мешіт атынан Құран кітап (QR код арқылы аудионұсқасы оқылады) және басқа да сый-сияпат көрсетіп, шығарып салды.

Мешіт ақсақалдары да қазақтың салты бойынша Танабай қарттың иығына шапан жауып, ізгі тілектерін өлең шумақтарымен жеткізді.

Сөз соңында көп жылғы көз үйір болған құлшылық ордасымен қимай қоштасқан Танабай ақсақал көңілі босап, көзіне де ерік берген сәтті – басқа да мешіт жамағаты мен мешіт қызметкерлері үшін ғибрат боп қала бермек.

Дереккөз: «Сәдуақас қажы Ғылмани» мешітінің баспасөз қызметі.

Пікірлер Кіру