BIRLIKTI SAQTAÝ – AMANAT

06 jeltoqsan 2021 5750 0
Оqý rejımi

Shynaıy musylman qorshaǵan ortaǵa qamqor, aınalasyna paıdaly, qoly men tilinen basqaǵa  zııan keltirmeıtin kórkem minez ıesi bolýy qajet. Sonymen qatar, ol óz ortasynyń tynyshtyǵyna da jaýapty. Túpki negizi Paıǵambarymyzdyń (s.ǵ.s.) hadısinen alynǵan qazaqtyń «kemedeginiń jany bir» degen maqaly qorshaǵan ortanyń amandyǵy, birligi jekelegen adamdardyń bárine qatysy baryn meńzeıdi. Bútindeı eldiń birligine syzat túsirmeýdiń jolyn alyp, dittegen maqsatqa birge jetý jetistikke aparary anyq.  

Qurnda: «Jer júzi túzetilgennen keıin búlinshilik qylmańdar»[1], – delingen. Bul – Alladan kelgen ámir. Demek, búlikke sebep bolý Jaratýshynyń qaharyna sebep bolmaq. Ǵalymdar aıtqandaı, ókinishtisi –jánnát qansha keń bolǵanymen, ondaı adamǵa oryn tabylmaýy múmkin.

Alla elshisiniń (s.ǵ.s.) bir hadısinde: «Senderge orazadan, namazdan, sadaqadan da dárejesi abzal bolǵan is jóninde habar bereıin be?» – dedi. Sonda sahabalar: «Árıne», – dedi. Sonda Paıǵambarymyz (s.ǵ.s.): «Óz aralaryńda qarym-qatynasty túzeý. Shyndyǵynda, qarym-qatynasty buzý  ustara syndy. Shashty qyrqady demeımin, dindi qyrqady», – dep jaýap bergen eken. Qulshylyǵy qur áreketten aspaı júrgen, jerin daý-damaıǵa aınaldyrǵan adamnyń namazy, orazasy, sadaqasynyń quny bolmaıtyndyǵyn osylaı eskertken. Demek, jamaǵattyń, eldiń birligi – eń mańyzdy másele. Meshitter – Allanyń úıi, qulshylyq orny bolǵannan keıin, ishki tártip,  ımamǵa baǵyný dinimizdiń tárbıesinen.

Babalarymyz ǵasyrlar boıy senimge syzat túsirmeı, bir mazhabty ustanyp, izgiliktiń, eldiktiń jolynda ter tókti, qurban boldy. Olardyń izin jalǵastyrý, bir jolda birge bolý – negizgi mindetimiz. Olaı bolsa, barshamyzǵa Alladan kelgen nyǵymetti baǵalap,  birlikti saqtaý – amanat bolmaq!

Qanat Qydyrmın
«Áziret Sultan» meshitiniń naıb ımamy

 


[1] «Aǵraf» súresi, 56-aıat.

Pіkіrler Kіrý