Jazmyshtan ozmysh joq

14 qyrkúıek 2020 5856 0
Оqý rejımi

Bir kisi Súleımen paıǵambardyń saraıyna sáske ýaqytynda esi shyǵa júgirip kelipti. Tyǵyz sharýasy bar ekendigin aıtqan ol, Súleımenmen (ǵ.s.) kezdestirýdi ótinipti.

Degbiri qashyp óńi qup-qý bolyp ketken oǵan Súleımen paıǵambar: – Jaıshylyq pa? Munsha nege qoryqtyń? Sebebi ne? – dep surapty.

Álgi kisi boıyn bılep alǵan úreıden álide aryla almaǵan keıipte: – Búgin erteńgisin dál qarsy aldymnan óńi susty Ázireıildi (ǵ.s.) kórdim. Maǵan tesile qaraǵan kúıi alystaı berdi. Shamasy, meniń janymdy alýǵa nıettengen sekildi, – depti jan-jaǵyna jaltaqtap.

– Sonda meniń ne isteýim kerek? – dep surapty ólimnen munsha qoryqqan álgi beıbaqqa kóz tastaǵan patsha-paıǵambar Súleımen (ǵ.s.).

– Sizden bir kómegińizdi ótinem, – depti sonda álgi kisi sózin jalǵap, – Siz – ań-qus bitkenniń tilin biletin, jan-janýar, taý-tasqa ámiri júretin úlken patshasyz. Qolyńyzdan bári de keledi. Jelge aıtyp, meni sonaý Úndistanǵa ushyryp aparyp jetkizýin buıyryńyzshy,- depti jalyna, – múmkin sol kezde jan alǵysh Ázireıil menen kóz jazyp qap, ólimnen qutylarmyn.

Súleımen paıǵambar (ǵ.s.) jylamsyrap turǵan álgi adamǵa jany ashyǵandyqtan, jeldi shaqyryp, ony Úndistanǵa aparyp tastaýyn buıyrypty.

Jel patsha jarlyǵyn eki etpesten quıyndatyp ala jónelgen kúıi jańaǵy adamdy birden Úndistandaǵy japan bir aralǵa aparyp tastapty.

Túske qaraı qaramaǵyndaǵylarmen jınalys quryp otyrǵan Súleımen kelgender arasynan Ázireıildi de baıqap qalypty. Birden qasyna shaqyryp alyp: – Eı, Ázireıil! Sáske kezindegi álgi beıbaqtyń júregin alyp, sonsha qorqytqanyń ne? Nege alaıyp qaradyń? – dep surapty.

Sonda Ázireıil (ǵ.s.): – Ýa, álemniń baǵa jetpes patshasy! Men oǵan sus kórsetpedim, tek tańǵala qaradym. Ózi qorqyp ketken bolar. Men onyń osy jaqta júrgenine tańyrqaǵan edim. Óıtkeni Alla Taǵala maǵan onyń janyn búgin keshke Úndistanǵa baryp alýymdy buıyrǵan-dy. Men oǵan qarap turyp «Buǵan júz qanat bitse de Úndistanǵa, áı, búgin jete almas» dep tańǵalǵan edim. Tańǵalyspen júzine tesile qaraǵanym da sol bolatyn, – dep jaýap bergen eken.

Iá, «ajal aıdady» degen osy. 

Qudaıberdi Baǵashar

Pіkіrler Kіrý