1 jylda 142 otbasyǵa baspana berildi (FOTO)
Qazaqstan musylmandary dinı basqarmasy san ǵasyrdan beri ata-babamyzdan jalǵasyp kele jatqan qaıyrymdylyq sharasyn negizgi jumys baǵyttarynyń biri etip, osy salaǵa basymdyq berip keledi. Imam-moldalar demeýshi azamattar men jomart jandardyń qoldaýymen túrli deńgeıdegi qaıyrymdylyq isterge uıytqy bolýda.
Qazaqstan musylmandary dinı basqarmasyna qarasty «Zeket» qorynyń respýblıka boıynsha ótkizetin eń aýqymdy qaıyrymdylyq jobasynyń biri – «El úlesi – páterge» aktsııasy. Joba maqsaty – páterge asa muqtaj jandarǵa baspanaly bolý baqytyn syılaý. 2020 jyly «El úlesi – páterge» jobasy aıasynda 142 muqtaj otbasyǵa páter kilti tabystaldy. Al osy joba júzege asqan sátten beri 342 otbasy baspanaly boldy.
Bas múftı Naýryzbaı qajy Taǵanulynyń bastamasymen pandemııa kezinde «Júrek jylýy» aktsııasy aıasynda 17 myń otbasyǵa qaıyrymdylyq jasaldy. 67 aýrýhanaǵa em-domǵa qajetti apparattar jetkizildi.
Úılerin sý shaıyp ketken maqtaaraldyq azamattarǵa qajetti azyq-túlik pen kıim-keshek tıelgen 50-den astam aýyr júk kólikteri jiberildi. «Arysqa jylý» qaıyrymdylyq aktsııasy aıasynda turǵyndarǵa qajetti kómek kórsetildi.
«Zeket» qory múftııattyń 30 jyldyq mereıtoıyna oraı «Nur-Múbárak» ýnıversıtetinde oqıtyn 19 shákirttiń oqý aqysyn tóledi. Odan bólek ózge oqý ornynda oqyp jatqan 17 stýdenttiń oqý aqysy tolyq tólendi.
