20 shilde – Qurban aıt merekesiniń birinshi kúni
Islam dininde zulhıjja aıynyń alǵashqy on kúni qasıetti kúnder sanalady. Hıjrı jyl sanaýy boıynsha 1442 jyldyń zulhıjja aıy 11 shilde kúni bastaldy. Al arapa kúni 19 shildege sáıkes keledi. 20 shilde – Qurban aıt merekesiniń birinshi kúni. Qazaqstan musylmandary dinı basqarmasy kóptegen musylman elderiniń ǵulamalarymen keńesip, osyndaı pátýa qabyldady.
Zulhıjja aıynyń alǵashqy on kúninde barynsha yntamen ǵıbadat etip, kóbirek izgi ister men jaqsy amaldar jasaýǵa tyrysý kerek. Óıtkeni, hadısterde sol ýaqytta oryndalǵan ıgi isterdiń saýaby eselenip jazylatyny aıtylǵan.
Al arapa kúni oraza tutý – súnnet. Paıǵambarymyz Muhammed (oǵan Allanyń salaýaty men sálemi bolsyn): «Arapa kúni oraza ustaý arqyly Alladan ótken jáne kelesi jyldyń kúnásin keshirýdi úmit etemin» degen
Qurban aıt namazynan keıin úsh kún ishinde baı adamǵa qurbandyq shalý mindet (ýájip) bolady. Alla Taǵala qasıetti Quranda: «Rabbyńnyń razylyǵy úshin namaz oqy jáne qurbandyq shal» dep buıyrǵan («Káýsar» súresi, 2-aıat). Hadıste: «Paıǵambarymyz (oǵan Allanyń salaýaty men sálemi bolsyn) qurbandyqqa eki aq qoshqardy jatqyzyp, aıaǵymen tirep, bısmılláni jáne tákbirdi aıtyp, baýyzdady», – delingen (Býharı men Múslım).
Qurbandyq shalý Alla Taǵalaǵa jaqyn bolý, kúnálar keshirilý, Jaratýshy Iemizdiń kóptegen nyǵmetterine shúkir etý, baı men kedeıge keńshilik jasaý úshin mindetteldi. Óıtkeni, osy kúni barlyq adam Alla Taǵalanyń qonaǵy bolady, qurban etinen jeıdi, ony tartý etedi, odan sadaqa beredi.
Qurban shalý arqyly pende Ibrahım paıǵambardyń súnnetin jandandyrady. Qurban aıt kúni Ibrahım paıǵambar óziniń balasy Ismaıldy qurbandyqqa pıda etkenin eske alady, olardyń bir minezdiligin, qaıyspaıtyndyǵyn jáne Qudaıǵa degen súıispenshiligin úlgi tutady.
Alla Taǵala elimizge amandyq, jurtymyzǵa tynyshtyq násip etkeı! Barsha musylman halqyna bul aıdy saýapty istermen ótkizip, Jaratqan Iemizdiń meıirimi men keshirimine kenelýdi násip etkeı! Ámın!
