Ábsattar qajy Derbisálini aqtyq saparǵa shyǵaryp salý rásimi ótti (FOTO)
Búgin kúnderdiń sultany juma kúni Almaty Ortalyq meshitinde kórnekti ǵalym, akademık, Qazaqstan musylmandary dinı basqarmasynyń 2000-2013 jyldar aralyǵyndaǵy Bas múftıi Ábsattar qajy Derbisálini aqtyq saparǵa shyǵaryp salý rásimi ótti.
Marqumnyń janaza namazyn Ábsattar qajynyń shákirti, QMDB Tóraǵasy, Bas múftı Naýryzbaı qajy Taǵanuly oqyp, qaıǵy jamylǵan áýletke sabyr tiledi.
«Ábsattar qajy Baǵysbaıuly elimizdiń din salasyna ǵana emes, ult rýhanııatyna súbeli úles qosqan biregeı tulǵa edi. Tarıhta aty qalǵan ıgi jaqsylardy qaıta tiriltip, elmen qaýyshtyrdy. Qazaqstan musylmandarynyń birligi men bilimdi bolýyna kóp kúsh saldy. Qurban aıttyń alǵashqy kúniniń memlekettik mereke retinde qabyldanýyna atsalysty.
Kesheden beri Ábsattar qajynyń áýleti men ózi on jyldan astam ýaqyt basqarǵan Qazaqstan musylmandary dinı basqarmasyna jan-jaqtan kóńil aıtý jedelhattary kelip jatyr. Memleket basshysy Qasym-Jomart Toqaev, Elbasy Nursultan Nazarbaevtan bólek, alys-jaqyn shetelderdegi Dinı basqarmalardyń bas múftıleri qaıǵymyzǵa ortaqtasyp, kóńil aıtýda. Tipti Ábsattar aǵamyz aýrýhanaǵa tústi degende kúlli Qazaq eli alaqanyn jaıyp, Alladan shıpa tiledi.
Minekı, Haqqa da, halyqqa da qyzmet etken tulǵanyń qandaı abyroıly, jaqsy azamat bolǵany osydan-aq belgili. Aǵamyzdyń otbasy men aǵaıyn-týysyna kórkem sabyr, jeńildik tileımin. Rýhyńyz shat, barar mekenińiz jánnat bolǵaı!» – dedi Bas múftı.
