Ábsattar qajy Derbisáliniń qazasy – barsha musylman qaýymynyń ortaq qaıǵysy
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Ábsattar qajy Derbisáliniń qazasyna baılanysty marqumnyń otbasyna, barsha musylman qaýymyna kóńil aıtty.
«Ábsattar qajy Derbisáli dúnıeden ozdy. Osyndaı qaıǵyly habar janymyzǵa qatty batyp otyr. Ǵalymnyń aýyr hálde jansaqtaý bólimine túskenin estigen sátte Dinı basqarma qyzmetkerlerimen duǵa etken edik. Allanyń ámirine amal bar ma?! Jalǵan dúnıemen qosh aıtysatyn ýaqyty jetken eken. Marqumnyń otbasyna, týǵan-týystaryna, barsha musylman qaýymyna qaıǵyra kóńil aıtamyn. Alla aldynan jarylqasyn. Imany salamat bolǵaı.
Ǵumyryn ǵylym men bilimge, dinı aǵartý salasyna arnaǵan Ábsattar qajy Baǵysbaıuly Qazaqstan musylmandary dinı basqarmasyn basqarǵan 10 jyldan astam ýaqyt aralyǵynda múftııattyń oqý-aǵartý salasyn jańa deńgeıge kóterdi. Onyń qalamynan týǵan ǵylymı eńbekter men ǵıbratty shyǵarmalar óz oqyrmandaryn izgilik pen izdeniske, ımandylyq pen adamgershilikke úndeı beretini sózsiz.
Bas múftı laýazymyna saılanǵan sátte batasyn berip, Dinı basqarma jumysyn jandandyrý boıynsha aqyl-keńesin aıtyp, janashyrlyq nıetin bildirip edi. Múftııattyń qurylǵanyna 30 jyl tolýyna oraı uıymdastyrylǵan halyqaralyq konferentsııaǵa da kelip, mazmundy baıandama jasady. Dinı basqarmany ár jyldary basqarǵan Bas múftılerdiń elorda tórinde basqosýy tarıhı sátterdiń birine aınaldy.
Ábsattar qajy Derbisáli Bas múftı bolǵan kezde qyzmetke degen uqyptylyǵymen, is-qaǵazdardy júrgizý barysynda tııanaqtylyǵymen, basqarý isinde aqylgóı basshy qasıetimen, adamdarmen til tabysýda zııaly bolmysymen, ǵylymı izdeniste tabandylyǵymen, t.b. úlgi bolar sıpattarymen este qaldy.
Mundaıda ol kisi týraly ótken shaqpen estelik jazý qandaı aýyr deseńshi?! Alla Taǵala qadirli aǵamyzdy panasyna alǵaı. «Dostan – duǵa» degendeı, endigi qoldan keler is – marqumǵa Alladan jarylqaý tileý, Quran baǵyshtaý. Janyńyz jánnatta bolsyn, Haziret!» delingen Bas múftıdiń kóńil aıtý jedelhatynda.
