«Ábý Bákir Syddyq» medrese-kolledjiniń sport kesheni ashyldy (FOTO)
Pavlodar qalasyndaǵy «Ábý Bákir Syddyq» medrese-kolledjine arnalyp jańadan salynǵan sport kesheniniń ashylý rásimi boldy.
Sharaǵa oblystyń bas ımamy Joldas Qospaquly, oblystyq din isteri basqarmasynyń basshysy Dáýlet Qoqanuly, Pavlodar qalasynyń ákimi Erjan Imanıslamuly jáne atalmysh sport keshenin turǵyzǵan qurylys kompanııasynyń jaýapty adamdary, qala meshitiniń ımamdary, medrese shákirtteri qatysty.
«Ábý Bákir Syddyq» medresesi 2020 jyldyń 9 qazanynda medrese-kolledj mártebesin alǵan edi. Zańnamaǵa sáıkes medreseniń óz sport kesheni bolýy tıis. Osyǵan oraı 2019 jyldyń tamyzynda «KSP STEEL» JShS-niń qoldaýymen sport kesheniniń qurylysy bastalyp, 2021 jyldyń qańtarynda aıaqtaldy.
Joldas Qospaquly sport kesheni jaıly qysqasha tanystyryp, demeýshiler men atqarýshylarǵa zor alǵys bildirip, syı-sııapat usyndy. Pavlodar qalasynyń ákimi Erjan Imanıslamuly jáne qurylys demeýshileriniń biri Edýard Lvovıch nysannyń lentasyn qıdy. Sońynda qala basshylary sport kesheni jáne medrese-kolledj ǵımaratyn aralap tanysty.
