Adam quqyǵy men ar-namysy – bárinen bıik qundylyq
Qurmetti qaýym!
Barshańyzdy elimizdegi eleýli kúnniń biri – Konstıtýtsııa kúni merekesimen shyn júrekten quttyqtaımyn. Ár otbasyǵa myqty densaýlyq, baqyt pen birlik, tabys pen bereke tileımin.
Islam dini adam balasyna ádil bolýdy, birlik pen tatýlyq, dostyq pen adamgershilik qundylyqtar aıasynda ómir súrýdi ámir etedi. Qasıetti Quranda: «Negizinen Alla senderge amanattardy óz laıyqty ornyna tapsyrýlaryńdy jáne adamdardyń arasyna bılik qylsańdar, ádildikpen bılik qylýlaryńdy ámir etedi. Rasynda Alla senderge nendeı jaqsy ýaǵyz beredi. Sháksiz Alla, tolyq estýshi, tym qyraǵy», («Nısa» súresi, 58-aıat) – degen.
Ár adam – óz otbasyna jaýapty tulǵa. Ádildik pen izgilikti óz otbasymyzdan bastap, aınaladaǵy jaqyn adamdarǵa jaqsy isimiz ben kórkem minezimiz arqyly qarym-qatynas jasaǵanymyz abzal. Bul – sharıǵat pen memleket zańynyń bizge júkteıtin mindeti.
Ata Zańymyzdyń birinshi babynda: «Qazaqstan Respýblıkasy ózin demokratııalyq, zaıyrly, quqyqtyq jáne áleýmettik memleket retinde ornyqtyrady, onyń eń qymbat qazynasy – adam jáne adamnyń ómiri, quqyqtary men bostandyqtary», – dep kórsetilgen.
Rasynda, adamnyń quqyǵy men bostandyǵynan asqan qundylyq joq. Osy qundylyqtardy saqtap, urpaqqa amanat etý – barshamyzdyń asyl mindetimiz. Ardaqty Paıǵambarymyz Muhammed (oǵan Allanyń salaýaty men sálemi bolsyn): «Musylmannyń qany, dúnıe-múlki jáne ar-namysy ózge musylmandarǵa haram» degen. Bul hadıs ózgeniń táni men janyna, dúnıe-múlki men ar-namysyna zııan tıgizbeýge úıretedi.
Alla Taǵala barshamyzdy eki dúnıe abyroıy men nyǵmetine bólep, elimizge amandyq, jerimizge tynyshtyq násip etkeı. Ámın!
