Álimǵazy Raıymbekov dúnıeden ozdy
Elimizge tanymal akter, Mádenıet qaıratkeri, Almaty oblysynyń Qurmetti azamaty Álimǵazy Raıymbekov ómirden ozdy.
Ol 1936 jyldyń 1 jeltoqsanda Almaty oblysynda dúnıege keldi. Eńbek jolyn kólik júrgizýshisi bolyp bastady. Keıin Sháken Aımanovtyń kózine túsip, kıno salasynda talaı beıneni somdady.
Ras, Álimǵazy aǵany kınosúıer kópshilik qazaqtyń klassıkalyq kınosy sanalatyn Sháken Aımanovtyń «Taqııaly perishte» fılmi (1968 jyl) arqyly jaqsy tanıdy. Fılmde Álimǵazy Raıymbekov taqııaly boıdaq Taılaqtyń rólin somdap, kópshiliktiń súıispenshiligine bólengen bolatyn. Sondaı-aq «Taqııaly perishteden» buryn Ázirbaıjan Mámbetovtiń «Án qanatynda» (1966) fılminde – Qapan, Abdolla Qarsaqbaevtyń «Qıly kezeńinde» (1966) – Súıindik rólinde, basqa da kóptegen fılmde oınady. Eldiń syı-qurmetine bólendi. Qazaqstannyń Mádenıet qaıratkeri, Almaty oblysynyń Qurmetti azamaty ataqtaryna ıe boldy.
Kóńili daladaı keń, júzine meıirim uıalaǵan Álimǵazy ata dinimizdiń de janashyry boldy. Aqsaqal Almaty óńirindegi meshitter uıymdastyrǵan barlyq sharadan qalmaı, aq batasyn berip, tilekshi bolyp júrýshi edi. Qaıǵyly qazaǵa oraı Bas múftı Naýryzbaı qajy Taǵanuly aqsaqaldyń týystaryna kóńil aıtý jedelhatyn joldady.
«Bárimiz Allaǵa tánbiz ári Allanyń quzyryna qaıta oralý úshin bu dúnıege ýaqytsha ǵana turalaýǵa kelgen qonaqpyz. Kúlli qazaqtyń mańdaıyna bitken mádenıet qaıratkeri, aty ańyzǵa aınalǵan belgili akter aǵamyz, asyl dinimizdiń janashyry Álimǵazy Sumaǵululy Raıymbekovtyń baqılyq bolýy týraly qaıǵyly habar meniń de janyma batty. Ózimniń jáne Qazaqstan musylmandary dinı basqarmasy ujymy atynan marqumnyń týystaryna kóńil aıtamyn. Aǵamyzdyń ataǵy asqaq bolsa da qarapaıymdylyǵy men naǵyz adamı qasıetteri ataǵynan da asqaq bolǵan tulǵasy, eńbek súıgishtigi barshamyzǵa úlgi bolatyn. Alla Taǵala aǵamyzdy Raqymyna bólep, jánnatyn násip etkeı. Ámın!» delingen jedelhatta.
