Almatyda «Ihsan – rýhanı tárbıe negizi» kitabynyń tanytymy ótti (FOTO)
Búgin Almaty qalasyndaǵy Ulttyq kitaphanada Bas múftı Naýryzbaı qajy Taǵanulynyń jetekshiligimen jaryqqa shyqqan «Ihsan – rýhanı tárbıe negizi» kitabynyń tanytymy ótti.
Is-sharaǵa QMDB Tóraǵasy, Bas múftı Naýryzbaı qajy Taǵanuly, Qazaqstan Jazýshylar odaǵynyń tóraǵasy Ulyqbek Esdáýlet, jazýshy Smaǵul Elýbaı, qoǵam qaıratkeri Asyly Osman, QMDB Tóraǵasynyń orynbasary, naıb múftı Ershat Ońǵar, QMDB Ǵulamalar keńesiniń músheleri Shamshádın Kerim, Tóráli Qydyr, Yqtııar Paltóre, Almaty qalasy Mádenıet basqarmasynyń basshysy Ǵanı Aıdaruly, Almaty qalasynyń bas ımamy Tólebı Ospan, Almaty qalasy Din isteri jónindegi basqarmasynyń basshysy Nurlan Medsantuly, Nur-Múbarak ýnıversıtetiniń prorektory Qaırat Qurmanbaev, Ulttyq kitaphana basshysy Baqytjamal Qaıyrbekqyzy, aqyn Qul-Kerim Elemes, elge belgili qalamgerler, beldi jýrnalıster men blogerler, óner juldyzdary men sport sheberleri jáne onlaın túrde oblys bas ımamdary men qala ımamdary qatysty.
Igi is-shara Almaty qalasynyń bas ımamy Tólebı Ospannyń Quran oqýymen bastaldy. Bas múftı oqylǵan Qurannyń saýabyn marqumdarǵa baǵyshtap, jıynǵa qatysýshylarǵa izgi tilegi men alǵysyn bildirdi. Naýryzbaı qajy Taǵanuly ıhsan asyl dinimiz ben qazaq rýhanııatyndaǵy úlken mańyzǵa ıe ilim ekenin aıta kelip: «Memleket basshysy Qasym-Jomart Toqaevtyń qabyldaýynda bolǵanymda elimizde Ishan ilimin keńinen nasıhattaý qajettiligi týraly bastama kóterdim. Prezıdentimiz bul bastamany qoldaıtynyn jetkizip, ıgi tilegin bildirdi. Biz halqymyzdyń júregine jaqyn rýhanı ilimdi keńinen nasıhattaý úshin «Ihsan – rýhanı tárbıe negizi» kitabyn shyǵarýdy qolǵa alǵan edik. Mine, erekshe ynta-yqylaspen jazylǵan qolyńyzdaǵy bul eńbek sizdiń de rýhanı ómirińiz úshin paıdaly bolady degen úmittemin», – dedi. Sonymen qatar, QMDB Tóraǵasy jańa kitaptyń jańashyldyǵyna toqtalyp, osy eńbekti shyǵarýǵa atsalysqan azamattarǵa alǵys aıtty.
Jıyn barysynda qurmetti qonaqtar da qundy eńbektiń jaryq kórýimen quttyqtap, Dinı basqarmanyń ıgi bastamalaryna jyly lebiz bildirdi. Sharany Qazaqstan Jazýshylar odaǵynyń tóraǵasy Ulyqbek Esdáýlet júrgizdi.
Aıta keteıik, «Ihsan – rýhanı tárbıe negizi» kitabynda «Jaratýshy Allaǵa ıhsan», «Tulǵalyq ıhsan», «Ihsan jáne qoǵam» syndy taraýlar qamtylyp, Islam ǵulamalarynyń ıhsan ilimi jaıly oı-tolǵamdary berilgen.
