Almatyda QMDB ǵulamalar keńesiniń HHHI májilisi ótýde (FOTO)
Búgin Almaty qalasynda Bas múftı Naýryzbaı qajy Taǵanulynyń tóraǵalyq etýimen Qazaqstan musylmandary dinı basqarmasy janyndaǵy Ǵulamalar keńesiniń XXXI májilisi bastaldy.
Keńes jumysyn ashqan Naýryzbaı qajy Taǵanuly: «Ózderińizge belgili, Ǵulamalar keńesi sharıǵatymyzdyń negizderine súıene otyryp, qoǵamdaǵy musylman qaýymy arasynda týyndap otyrǵan kókeıkesti, túıtkildi máselelerdi talqylap, der kezinde sharıǵı pátýalar men kontseptýaldy qujattar qabyldaıdy.
Allaǵa shúkir, Ǵulamalar keńesi pandemııa kezinde de jumysyn toqtatpady. Osy jyly keńes jumysynda 12 pátýa, 2 qujat jáne 2 ǵylymı joba bekitildi» dedi.
Aıta ketsek, májiliste «Foreks naryǵyna qatysty úkim», «Jerlengen marqumnyń topyraǵyn alyp, basqa jerge kóshirip qabir jasaý úkimi (rámizdi qabir jasaý úkimi)», «Jasandy jańbyr jaýdyrý úkimi», «Gıv (gıvEveı) oınatý úkimi», «Onlaın neke qııý úkimi», «Tekti (famılııany) aýystyrý úkimi» taqyrybynda jazylǵan pátýalar qabyldanbaq.
