Amin.kz medıa ortalyǵy jumysyn bastady (FOTO)
Atyraý ortalyq meshitinde amin.kz saıtynyń tól jobalaryn júzege asyrý maqsatynda arnaıy medıaortalyq ashyldy.
Amin.kz medıa ortalyǵynyń ashylýyna QMDB Aqparat jáne qoǵammen baılanys bóliminiń meńgerýshisi Marat Bektazınov arnaıy kelip qatysyp, sáttilik tiledi.
«Táýelsizdiktiń 30 jyldyq mereıli datasymen tuspa-tus kelip otyrǵan osynaý qýanyshty jańalyq dinimizdi dáripteýde jańasha formatta jumys isteýge múmkindik beredi. Din qyzmetkerleriniń aldynda medıakeńistiktiń zamanaýı múmkindikterin paıdalaný mindeti tur» dep atap ótti Marat Bektazınov.
Zamanaýı tehnıkalyq qural-jabdyqtarmen qamtamasyz etilgen medıaortalyq bazasynda rolıkter, ruhanı suhbattar, adamgershilik, izgilik qundylyqtaryn dáripteıtin ýaǵyz-nasıhattar túsiriledi. Sonymen birge áleýmettik jeli múmkindikterin kóbirek qoldaný josparda bar. Iaǵnı medıaortalyqta feısbýk, ınstagram jelileri, ıýtýb kanaldary arqyly tikeleı Efırler ótkiziledi.
«Imamdar, ustazdar, din qyzmetkerleri jeli qoldanýshylarynyń saýaldaryna turaqty túrde jaýap beredi. Bul da bolsa ýaǵyz-nasıhat formatynyń jańaryp, jalpy aýdıtorııany keńeıtý maqsatynda iske qosylyp otyrǵan mehanızm» dedi Atyraý oblysynyń bas ımamy Altynbek Utyshanuly.
Qazirgi ýaqytta Atyraý oblysynda 33 meshit bar. Bas ımamnyń tapsyrmasymen, atalǵan meshitterdiń barlyǵynda ınstagram, feısbýk jelilerinen resmı paraqshalar ashylyp, jumys isteýde.
