«Ánet baba» meshitinde medıa ortalyq ashyldy (FOTO)
Búgin Qaraǵandy oblystyq «Ánet baba» meshitinde medıa ortalyq ashyldy. «IHSAN MEDIA» dep atalatyn jańa ortalyqtyń ashylýyna QMDB Tóraǵasy, Bas múftı Naýryzbaı qajy Taǵanuly arnaıy qatysty.
Aımaqtyń bas ımamy Ómirzaq Qazkenulynyń aıtýynsha, keshen qajetti tehnıkamen tolyq jabdyqtalǵan. Sonymen qatar stýdııa ishinde tikeleı Efır uıymdastyrýǵa da múmkindik bar.
Jańa stýdııanyń jumysymen tanysqan Bas múftı óziniń aqjarma tilegin jetkizip, qazirgi qoǵamdaǵy aqparat taratýdyń mańyzyna toqtaldy.
«Qoǵamnyń suranysy, ómirimizdiń bir bólshegine aınalǵan televızııa, onlaın habar taratý isinde jańashyldyqqa bet buryp, osyndaı stýdııa ashý – bizdiń tól telearnamyzǵa dem berip, dindi taratýdaǵy ónegeli is. Qazir aqparattyq qoǵamda nasıhatsyz bolmaıtynyn ımamdar jaqsy túsindi. Óıtkeni jumysyńdy kórsetý, ýaǵyzyńdy jetkizý bári osy telearna arqyly júrip jatyr. Jańa stýdııadan jaqsy habarlar, sapaly ýaǵyzdar, maǵynaly suhbattar jasalyp shyqsyn. Isterińizge bereke tileımin» dedi Bas múftı.
Aıta keteıik, jańa keshende táýlik boıy habar taratý, tikeleı Efırge shyǵýǵa barlyq jaǵdaı qarastyrylǵan. Endi bul stýdııa «Halyq arna» telearnasyna suhbattar, arnaıy sıýjetter daıyndaıdy.
