«As berý mádenıeti» qujaty qabyldandy (FOTO)
Búgin elordada ótken «Islam – mádenıet pen izgiliktiń bastaýy» atty ımamdardyń IV respýblıkalyq onlaın-forýmynda «As berý mádenıeti» qujaty qabyldandy.
Forýmda atalǵan qujatty jan-jaqty tanystyryp, baıandama jasaǵan naıb múftı Ershat Ońǵarov: «Atalǵan qujat Qazaqstan musylmandary dinı basqarmasy janyndaǵy Ǵulamalar keńesiniń birneshe májilisinde talqylanyp, bekitilgenin basa aıtyp ketkim keledi. Bul qujatty qabyldaýdaǵy negizgi maqsat – elimizdiń barlyq aımaǵy boıynsha qudaıy astardy sharıǵat sheńberinde, salt-dástúr aıasynda ótkizý. Sonymen qatar, keıbir otbasylardyń áleýmettik jaǵdaıyna salmaq salmaıtyn, ysyrapqa jol bermeıtin as berý mádenıetin qalyptastyrý jáne ony nasıhattaý.
Qujatta qudaıy as berýdiń tarıhı máni, anyqtamasy, din men dástúrdegi orny, ózektiligi jan-jaqty saralanyp, táptishtep túsindirildi. Qolyńyzdaǵy qujatta qudaıy as berý mádenıetiniń negizgi jeti tiregi usynyldy. Jeti tirek ishinde shynaıy nıet etý, qudaıy asqa jınalý, Quran oqý, bata berý jáne duǵa jasaý, ysyrapqa jol bermeý, qudaıy asta ýaǵyz-nasıhat aıtý, marqumdy eske alý jáne qaraly otbasyn jubatý, qudaıy asta qarapaıymdylyqty saqtaý syndy taqyrypshalar qamtyldy» dep atap ótti.
Sonymen qatar memleket jáne qoǵam qaıratkerleri – Myrzataı Joldasbekov, Ádil Ahmetov qujat týraly pikir bildirip, oılaryn ortaǵa saldy.
