ASTANADA IV RESPÝBLIKALYQ JYRShY-TERMEShILER FESTIVALI ÓTTI

Búgin Astanada Qazaqstan musylmandary dinı basqarmasynyń uıymdastyrýymen «Babalar sózi – danalyq kózi» atty IV respýblıkalyq jyrshy-termeshiler festıvali ótti.

Atalǵan sharaǵa QMDB Tóraǵasy , Bas múftı Naýryzbaı qajy Taǵanuly sondaı-aq, Qazaqstan Respýblıkasy Parlamenti Senaty men Májilisiniń depýtattary, zııaly qaýym, kórshiles memleketterdiń elshileri, din qyzmetkerleri jáne konfessııa ókilderi qatysty.

«Jyrshy-termeshiler – halyqtyń shejireshisi, júrektiń únin jetkizýshi danalyq ıeleri. Sizder eldiktiń, yntymaq pen ımandylyqtyń jarshysy bolǵan tulǵasyzdar. Qazaq dalasynda jyraýlar tek óner ıesi emes, halyqtyń aqylgóıi, el tiregi, rýhanııat janashyry bolǵan. Sondyqtan sizderge artylǵan jaýapkershilik úlken. Islam dinimen sabaqtasqan ulttyq ónerimiz adamzatqa izgilik pen adamgershilikti nasıhattap keledi»,-dedi Naýryzbaı qajy Taǵanuly óz sózinde.

Shara barysynda elimizdiń ár óńirinen kelgen jyrshy-termeshiler óz ónerlerin kórsetti. Atap aıtqanda, Erbolat Shaldybekov, Farqat Orazov, Temirbek Asqambaev, Elmura Jańabergen, Qylyshbek Synabaı, Márııam Ketebaeva, Ádilbek Sarın, Ospan Qulsymaq, Ádilhan Qýańbaev jáne Kúnsulý Túrikpen izgilikke arnalǵan jyr-termelerdi sheber oryndap, kórermenge erekshe rýhanı áser syılady.

Kesh barysynda qazaqtyń jyraýlyq mektebiniń damýyna ólsheýsiz úles qosyp júrgen belgili jyraý Almas Almatov arnaıy ortaǵa shaqyrylyp, Bas múftı jyraýdy mereıli 70 jasymen quttyqtap, ıyǵyna shapan japty.

Sondaı-aq, barlyq ónerpazdar Bas múftıdiń alǵys hatymen marapattaldy.

Aıta keteıik, kóne dinı óleńder men minájat jyrlaryn jańǵyrtýdy maqsat etken bul festıval tórtinshi ret respýblıkalyq deńgeıde uıymdastyryp otyr. Buǵan deıingi festıvaldar 2022, 2023 jáne 2025 jyldary ótkizilgen bolatyn.





























 

Источник: Aidos