Aýyl ımamdaryna qarjylaı sertıfıkat berildi (FOTO)
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Syr óńirine jasaǵan jumys saparynda aýyl ımamdarymen kezdesti.
Kezdesýde Bas múftı: «Sizder Paıǵambar (oǵan Allanyń salaýaty men sálemi bolsyn) jolyn jalǵap, jaýapkershiligi mol ımamdyq qyzmettiń qıyndyǵyna qaramastan Allanyń asyl dini úshin aıanbaı eńbek etip kelesizder. Halyqpen birge jasap jatqan adal qyzmetterińiz úshin alǵys bildiremin» dep ımamdarǵa sheksiz rızashylyǵyn jetkizdi.
Budan keıin QMDB tóraǵasy Naýryzbaı qajy Taǵanuly aýyldaǵy din qyzmetkerleriniń mártebesin kóterip, yntasyn arttyrý maqsatynda Qyzylorda oblysynyń 7 aýdany, atap aıtqanda, Aral, Qazaly, Qarmaqshy, Jalaǵash, Syrdarııa, Shıeli jáne Jańaqorǵan aýdandaryna qarasty jeti aýyl meshitteriniń ımamdaryna 100 000 teńge kóleminde qarjylaı syıaqy sertıfıkatyn tabystady. Sondaı-aq eki áıel ustaz 50000 teńgelik sertıfıkatqa ıe boldy.
Aıta keteıik, bıyl Qazaqstan Respýblıkasynyń Táýelsizdigine 30 jyl tolýyna oraı Bas múftı Naýryzbaı qajy Taǵanulynyń tapsyrmasymen shalǵaı aýyldardaǵy áleýmettik jaǵdaıy az qamtylǵan din qyzmetkerlerine kómek berip, qoldaý bildirý jospary engizilgen bolatyn.
