Áıel-qyzdar sektorynyń jumysy jandandy (FOTO)
QMDB-nyń áıelder arasyndaǵy rýhanı salasyna jaýapty Áıel-qyzdar sektorynyń 2021 jylǵa arnalǵan jańa jobalary men josparynyń oryndalý barysy bastalyp ketti.
Jyl basy QMDB Tóraǵasy, Bas múftı Naýryzbaı qajy Taǵanuly hazrettiń tapsyrmasyna oraı, sektor meńgerýshisi Aqbópe Tilegenovanyń elimizdiń eń kóp halyq shoǵyrlanǵan Túrkistan oblysyna jasaǵan is-saparymen bastaldy. Aqbópe Qanatqyzy aımaqtaǵy Quran ortalyǵy men meshit-medreselerdi arnaıy aralap, ustazdar qaýymy jáne shákirttermen kezdesip, túrli taqyryptarda suhbat júrgizdi.
Áıel ustazdar qańtar aıynda kúnniń sýyǵyna qaramaı túrli salalar boıynsha qarqyndy jumys istedi. Atap aıtsaq, ustazdar jamaǵatpen birigip Qurandy 462 ret hatym etip, saýabyn marqumdarǵa baǵyshtap, elimizdiń amandyǵyn Alladan surap, naýqas jandarǵa shıpa tiledi. Karantın jaǵdaıynda kúndelikti júıeli túrde fıqh, otbasy ǵylymhaly, sahaba áıelder, otbasyndaǵy bala tárbıesi, otbasyndaǵy baqyt, sabyrlyq taqyryptarynda 7 557 adamǵa onlaın ýaǵyz aıtyldy.
Sektordyń aımaqtardaǵy jaýaptylary salaýatty ómir saltyn nasıhattaý maqsatynda birneshe qalada voleıboldan áıel jamaǵattary arasynda jarys ótkizdi. Osymen qatar elordamyz Nur-Sultan qalasynda meshitter arasynda Quran Kárimdi jatqa oqýdan saıys ótti. Kóptegen kópbalaly jáne muqtaj otbasylarǵa azyq-túlikpen jáne qarjylaı kómek kórsetildi.
