«Áziret Sultan» meshitinde bolashaq qajylarǵa arnalǵan dáris ótti
Elordadaǵy «Áziret Sultan» meshitinde bolashaq qajylarǵa arnalǵan arnaıy tanymdyq dáris ótti.
Rýhanı mańyzy zor dárister keshin «Áziret Sultan» meshitiniń naıb ımamy, qajylyq bólimine jaýapty maman Tamırlan Darhanuly júrgizip, qajylyq saparyna nıet etken jandarǵa paıdaly málimetter berdi.
Dáris barysynda Qajylyqtyń máni men mańyzy keńinen túsindirilip, onyń oryndalý tártibi, negizgi sharttary, ıhram kııý erejeleri, oqylatyn duǵalar men sapar barysynda saqtalatyn ádepter jan-jaqty baıandaldy. Sonymen qatar, qatysýshylar tarapynan jıi qoıylatyn suraqtarǵa naqty jaýaptar berilip, tájirıbelik turǵyda mańyzdy keńester usynyldy.
Atalǵan dáristerdiń basty maqsaty – jamaǵatqa Qajylyqqa durys ári saýatty daıyndalýǵa baǵyt berý, dinı bilimderin tereńdetý, qulshylyqty sharıǵat talaptaryna saı oryndaýdy úıretý jáne rýhanı tanymdaryn arttyrý boldy.
Jıynǵa qatysýshylar uıymdastyrýshylarǵa alǵystaryn bildirip, alǵan bilimderiniń aldaǵy qajylyq saparynda úlken paıdasy tıetinin atap ótti. Osyndaı tanymdyq ári taǵylymdy dárister aldaǵy ýaqytta da óz jalǵasyn tabady.
