BAS MÚFTI ABAI OBLYSYNDA JAŃA MEShITTIŃ AShYLÝYNA QATYSTY (FOTO)

Búgin QMDB Tóraǵasy, Bas Múftı Naýryzbaı qajy Taǵanulynyń qatysýymen Semeı qalasyna qarasty Stepnoı kentindegi jańa meshittiń ashylý saltanaty ótti.

Qulshylyq úıine ǵulama-ǵalym, din qaıratkeri, ustaz Ahmetsafa qajy Qaldybaıulynyń esimi berildi. Ashylý rásimine arnaıy qatysqan Bas múftı jamaǵatty quttyqtap, izgi tilegin jetkizdi.

«Qazaqstan musylmandary dinı basqarmasy qazaqtyń arǵy-bergi tarıhynda aty qalǵan, táýelsizdik jolynda kúresken azamattardyń esimin meshitterge berip keledi. Bul qulshylyq úıine ǵulama-ǵalym, din qaıratkeri Tynybaı meshitinde talaı jyl ımam bolǵan Ahmetsafa qajy Qaldybaıulynyń atyn berip otyrmyz. Alla úıin salǵan adamdarǵa qatysty Paıǵambarymyz (oǵan Allanyń salaýaty men sálemi bolsyn) bir hadısinde bylaı deıdi: «Kim jer betinde Allanyń úıin salýǵa at salyssa, Alla Taǵala ol kisige jumaqtan oryn daıyndaıdy». Babalarymyz «Azany bar aýyl azbaıdy» degen. Sondyqtan meshit – taǵylym men tárbıeniń orny. Jaratqannyń razylyǵyn alý maqsatynda aǵa-baýyrlarymyz osyndaı kelbetti ǵajap meshitti Dinı basqarmaǵa tartý etip otyr. Alla saýaptan jazsyn!» – dedi QMDB Tóraǵasy.

Ahmetsafa haziret Semeıdegi «Tynybaı» meshitinde 1954 jyldan 1973 jylǵa deıin ımam bolyp qyzmet etti. Iaǵnı, 20 jylǵa jýyq ýaqytyn myńdaǵan adamdy dinge tartýǵa, namazǵa uıytýǵa arnady. Qyzmet etken jyldary meshitke kúrdeli jóndeý jumystaryn júrgizip, qulshylyq úıine jańa dem berdi. El alǵysyna bólengen ǵulama-ǵalym ımamdyq qyzmetti abyroımen atqaryp, sanaly ǵumyryn dinge qyzmet etýge arnady. Búginde urpaǵy da dinge qyzmet etip, meshit ashyp otyr. Ahmetsafa Hazirettiń uly Muzafar jıylǵan jamaǵatqa rızashylyǵyn bildirip ákesi ustaǵan Quran men kıgen shapan-sáldesin Múftııat mýzeıine syılady.

Aıta keteıik, 5000 turǵyny bar Stepnoı kentinde buryn meshit bolmaǵan. Jańa meshit 100 adamǵa arnalǵan.