Bas múftı «Ál-Farabı» zaly men «Hákim Abaı» kitaphanasynyń ashylýyna qatysty (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly «ál-Farabı» zaly men «Hákim Abaı» atyndaǵy kitaphananyń ashylý rásimine qatysty.
«Biz shákirtterimizge ál-Farabı, Hákim Abaı syndy oıshyldarymyzdyń ǵıbratqa toly eńbekterin oqytý baǵdarlamasyn udaıy jalǵastyra berýimiz kerek. Bolashaq ımamdarymyz ǵulamalarymyz ben tulǵalarymyzdyń rýhanı murasynan ónege alyp, ony halyqqa jetkizýde belsendi bolýy tıis. Osy maqsatta Dinı basqarma janyndaǵy kitaphanaǵa Hákim Abaıdyń, úlken zalǵa ál-Farabı babamyzdyń esimin berý týraly sheshim qabyldadyq. Bul Dinı basqarma tarapynan «Rýhanı jańǵyrý» bastamasyna qosylǵan úles dep esepteımin. Biz din, tarıh, salt-dástúr sabaqtastyǵyn nasıhattaý isin jalǵastyra beremiz», – dep atap ótti Bas múftı Naýryzbaı qajy Taǵanuly.
Aıta ketsek, QMDB ǵımaratynda ornalasqan «ál-Farabı» atyndaǵy zalda 434 adam bir mezette ǵıbratty kezdesýler men keshterdiń kýási bola alady. Zaldyń aýmaǵy – 550 sharshy metr. Al «Hákim Abaı» atyndaǵy kitaphanada 2 myńnan astam kitap qory jınaqtalǵan. Kitaphana aýmaǵy – 128 sharshy metr.
