Bas múftı Almatyda juma namazyn júrgizdi (FOTO)
Búgin Qazaqstan musylmandary dinı basqarmasynyń Tóraǵasy Naýryzbaı qajy Taǵanuly Almaty qalasyndaǵy «Amanqul ata» meshitinde juma namazyn júrgizdi.
Qabirdi zııarat etýdiń ádebi men mádenıeti jaıynda hutba oqyǵan Bas múftı Naýryzbaı qajy Taǵanuly: «Islam – qulshylyq pen tirshilikti teń ustaýǵa buıyrǵan din. Islam dini osy dúnıeni aqyrettiń egin alqaby retinde qarastyryp, soǵan saı áreket etip, tek qana jaqsylyq jasaýǵa, kúnáli isterden boıdy aýlaq ustap, aqyret azyǵyn jınaýǵa shaqyrady. Paıǵambarymyz (oǵan Allanyń salaýaty men sálemi bolsyn): «Men senderdi qabirlerdi zııarat etýden tyıǵan edim. Endi zııarat etýlerińe bolady» degen. Osy rette jamaǵatty zııarat etýde Islam ádebin saqtaýǵa shaqyramyn» dedi.
Aıta ketsek, Dinı basqarma ımamdar forýmynda «Zırat jáne zııarat mádenıeti» qujatyn qabyldaǵan bolatyn. Qujatty qabyldaýdaǵy maqsat – halyqqa zırat kóterý men zııarat jasaýdyń ortaq ádebi men mádenıetin nasıhattaý.
