Bas múftı ardager ustazyna qurmet kórsetti (FOTO)
Elordada Bas múftı Naýryzbaı qajy Taǵanuly ardager ustaz, ǵalym Abdýlla Joldaspen suhbattasty.
Kezdesýde shákirt tárbıeleýdiń mańyzy, ımam-moldalardyń bilimin arttyryp, tájirıbesin shyńdaý, halyqtyń dinı saýatyn ashýda qajetti oqý quraldary men kitaptar shyǵarý syndy máseleler sóz boldy.
«Siz bizge bilimmen qatar, tálim berdińiz. Tabandylyqpen eńbek etip, qanshama shákirt tárbıeledińiz. Qazir sol shákirtterińiz jaýapty qyzmet atqarýda. Sizge taǵy da rııasyz nıetpen rızashylyǵymdy bildiremin», – dedi Naýryzbaı qajy Taǵanuly.
Basqosýda Bas múftı Dinı basqarma Islam Entsıklopedııasyn ázirlep jatqanyn jetkize kele: «Siz ǵylymmen aınalysqan ǵalym retinde osy bastamamyzǵa úles qossańyz nur ústine nur bolar edi», – dedi.
QMDB ǵımaratyna birinshi ret kelgen Abdýlla Joldas jańa keńsege qutty bolsyn aıtyp, izgi nıetin bildirdi. Sonymen qatar Bas múftı ótinishin oryndaýǵa daıyn ekenin jetkizdi.
Kezdesý sońynda Naýryzbaı qajy Taǵanuly ardager ustaz Abdýlla Joldasty «Qazaqstan musylmandary dinı basqarmasyna 30 jyl» merekelik medalimen marapattady. Sondaı-aq belgili qarı, «Qaýam Ad-dın Ál-Itqanı Ál-Farabı Át-Túrkistanı» respýblıkalyq qarılar daıyndaý ortalyǵynyń dırektory Sádýaqas Oljabaıulyn da merekelik medalmen marapattady.
