Bas múftı Atyraýda baspasóz máslıhatyna qatysty (FOTO)
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Atyraý oblysyna jasaǵan jumys sapary aıasynda jergilikti jýrnalıstermen kezdesti.
Kezdesý barysynda Bas múftı vaktsına alýǵa sharıǵattyń kózqarasy, rýhanııat, dinı bilim alý syndy birqatar máseleler tóńireginde oı bólisti. Is-sharaǵa Atyraý oblysy ákiminiń orynbasary Baqytgúl Hamenova qatysty.
«Táýelsizdigimizben birge, halqymyz dinimizben, tilimizben, dilimizben qaıta qaýyshty. Elimizde Qazaqstan musylmandary dinı basqarmasyna qarasty 2700-den astam meshitter bar. Nur-Múbarak ýnıversıteti, medrese-kolledjder, Quran jattaý ortalyqtary dinı salany bilikti mamandarmen tolyqtyrýǵa yqpal etýde. Meshitterimiz rýhanııattyń, qaıyrymdylyqtyń ordasyna aınaldy» degen Bas múftı Naýryzbaı qajy Taǵanuly Qazaqstan musylmandary dinı basqarmasy tarapynan bekitilgen 7 negizgi jumys baǵyty týraly aıtyp ótti.
«Qazirgi tańda múftııat halyqty izgilikke biriktiretin izgi isterdiń ordasyna aınalyp otyr. Qýańshylyqtan zardap shegip jatqan aımaqtarǵa kómek qolyn sozýǵa úndeıtin «Qıyndyqta el birge» jobasy bir ǵana mysal bola alady. Osy joba aıasynda 7500 túk jınalyp, tıisti óńirlerge jetkizildi. Bul istiń basy-qasynda jergilikti ımamdar ben kásipkerler júrdi. Shópti tasymaldaý máselesine Qazaqstan temirjoly kompanııasy tarapynan úlken kómek berildi. Mundaı ister synaq kelgen ýaqytta múftııattyń árkez qarapaıym halyqtyń janynan tabylatyndyǵyn kórsetedi», – dep atap ótti QMDB Tóraǵasy.
Kezdesý barysynda Bas múftı koronavırýsqa qarsy ekpe alý máselesine, shet elde bilim alyp jatqan shákirtterdi qyzmetke tartý, ıhsan ilimin nasıhattaý, dástúrdi dáripteýge qatysty pikir bildirdi. Kezdesý sońynda Bas múftı jýrnalısterge «Ihsan – rýhanı tárbıe negizi» atty kitapty syıǵa tartty.
