Bas múftı aýdandyq Maǵjan Jumabaev meshitiniń irgetasyn qalady (FOTO)
Búgin Bas múftı Naýryzbaı qajy Taǵanuly Soltústik Qazaqstan oblysy Maǵjan Jumabaev aýdanynda aqyn esimimen atalatyn meshittiń irgetasyn qalady.
Igi is-sharada Naýryzbaı qajy Taǵanuly: «Halqymyzda: «Azany bar aýyl azbaıdy» degen naqyl bar. Meshit – barsha jaqsylyqtyń toǵysqan qutty mekeni. Meshit – Allanyń úıi. Irgetasy qalanǵan bul meshit qulshylyqtyń ǵana ordasy bolyp qalmaı, rýhanı hám mádenı-aǵartý, birlik pen berekeniń oshaǵyna aınalady degen senimdemin.
Jańa meshit, sonymen qatar, salt-dástúrimizdiń, taǵylymǵa toly tarıhymyzdyń nasıhatshysy, ári qaıyrymdylyqtyń ortalyǵy bolmaq. Meshit salý – saýaby úzilmeıtin saýapty is! Osy Alla úıiniń qurylysyn qolǵa alǵan dinimizdiń janashyr azamattaryna, tileýlestik bildirgen barsha jamaǵatqa ózimniń jáne Qazaqstan musylmandary dinı basqarmasynyń ujymy atynan alǵys aıtamyn. Alla razy bolsyn.
Elimiz aman, jurtymyz tynysh bolǵaı! Halqymyzdyń birligi nyǵaıyp, berekesi arta bergeı! Táýelsizdigimiz árqashan baıandy bolǵaı! Ámın!» dedi.
Meshittiń irgetasyn qalaý rásiminen keıin Bas múftı Maǵjan Jumabaevtyń rýhyna arnaıy Quran baǵyshtady.
Aıta ketsek, aýdan ortalyǵy Býlaev eldi mekeninde irgetasy qalanǵan meshitte bir mezette 300 adam namaz oqı alady.
