Bas múftı: «Azaly kezeńde ajal qushqan jandarǵa jaratqan jar bolǵaı!»
Qurmetti otandastar!
Halqymyz 31 mamyr kúni saıası qýǵyn-súrgin jáne asharshylyq qurbandaryn eske alady. Bul – zulmat zaman men zobalań náýbetti jyldardy bastan keshken jurtymyzdyń azaly kúnderin eske alatyn sát. Alla Taǵala azaly kezeńde ajal qushqan ata-babamyzdy meıirimine bólep, panasyna alǵaı. Jandary jánnatta shalqysyn dep duǵa etemiz.
Talaı taýqymet pen zulmat zamandy kórgen ultymyz syndarly sátterde rýhyn túsirmeı,yntymaǵyn ydyratpaı, táýelsiz el bolýǵa umtyldy. Allaǵa shúkir, keshegi babalarymyzdyń ańsaǵan armany búgin shyndyqqa aınaldy.
Ótken jyly Memleket basshysy Qasym-Jomart Toqeavtyń Jarlyǵymen Memlekettik komıssııa qurylyp, zulymdyqtyń qurbany bolǵan azamattardy tolyq aqtaý, olarǵa qatysty tarıhı ádildikti qalpyna keltirý jumystary júrýde. Prezıdentimiz aıtqandaı, qýǵyn-súrgin qurbandaryn tolyq aqtaý – memlekettiń ǵana mindeti emes, búkil qoǵamnyń paryzy.
Biz ótken jyly ımamdardyń respýblıkalyq forýmynda el erteńi úshin qurban bolǵan din qaıratkerlerin de tolyq aqtaý qajettigi týraly bastama kóterdik. Allaǵa shúkir, Memlekettik komıssııa quramyndaǵy ǵalymdar men sarapshylar ult bolashaǵy jolynda sheıit bolǵan din qaıratkerlerin de aqtaý boıynsha belsendi zertteý jumystaryn júrgizýde. Alla razy bolsyn!
Qadirli jamaǵat!
Ardaqty Paıǵambarymyz Muhammed (oǵan Allanyń salaýaty men sálemi bolsyn) musylman úmbetin ózgelerge kelgen synaq ózimizge kelmegeni úshin ári sol úshin shúkir bildirý retinde arnaıy duǵa jasaýdy úıretken. Osy rette musylman qaýymyn Allaǵa shúkir aıtyp, duǵa jasaýǵa shaqyramyn. Sonymen qatar solaqaı saıasattyń kesirinen opat bolǵan ata-babamyzǵa Quran baǵyshtap, Jaratqannan jarylqaý tileýge, el qamy úshin janyn qıǵan jandardyń zıratyn zııarat etip, qabir mańyna tazalyq jumystaryn júrgizýge shaqyramyn. Jaratýshy Iemiz izgi nıetimiz ben ıgi amalymyzdy qabyl etkeı.
Naýryzbaı qajy TAǴANULY, Qazaqstan musylmandary
dinı basqarmasynyń tóraǵasy, Bas múftı
