Bas múftı Ázerbaıjan elshisimen kezdesti (FOTO+VIDEO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Ázerbaıjannyń jańadan taǵaıyndalǵan Tótenshe jáne Ókiletti Elshisi Agalar Atamoglanovty qabyldady.
Kezdesýde taraptar Qazaqstan men Ázerbaıjan elderi arasyndaǵy ózara yntymaqtastyqty nyǵaıtý, burynnan qalyptasqan baýyrlas elder arasyndaǵy rýhanı baılanysty bekite túsý jaǵyn sóz etti.
Bas múftı jańadan kelgen Elshini quttyqtap, qyzmetine tabys tiledi. «Bizge kóp nárse ortaq. Túbimiz bir. Tarıhı baılanystarymyz da jeterlik. Eldestirmek elshiden degen. Eki eldiń arasyndaǵy yntymaqtastyqty arttyrý baǵytynda ortaq jobalardy júzege asyrýǵa Dinı basqarma árqashan daıyn. Biz Ázerbaıjan musylmandary dinı basqarmasymen de tyǵyz baılanystamyz. Osy rette rýhanı baǵyttaǵy irgeli isterdi birlese atqarýǵa shaqyramyn» - dedi Naýryzbaı qajy Taǵanuly.
Ázerbaıjan Elshisi Agalar Rahımoǵly óz kezeginde Bas múftıge jyly qabyldap, qurmet kórsetkenine rızashylyǵyn jetkizdi. «Baýyrlas, tamyrymyz ortaq elge kelgenime qýanyshtymyn. Maqsatymyz bireý. Ol – eki eldiń burynnan qalyptasqan tyǵyz baılanysyn jandandyryp ári qaraı jalǵastyrý. Qazaqstanǵa kelgenime 1 aıǵa jýyq ýaqyt ótti. Kóptegen kezdesýlerde boldym. Qonaqjaılyqtaryńyzǵa tántimin. Aldaǵy ýaqytta jańa jobalardy júzege asyrý maqsatynda qoldaý kórsetýge daıynbyz» dedi Elshi.
Sondaı-aq júzdesýde osy aıda Qazaqstanǵa saparmen kele jatqan Kavkaz musylmandary dinı basqarmasynyń tóraǵasy Sheıh-ýl-ıslam Allahshúkir Pasha-zademen bolatyn resmı kezdesýdiń jaı-japsary talqylandy.
Kezdesý sońynda Bas múftı Elshige óz tarapynan qurmet kórsetip, baýyrlas elder arasyndaǵy baılanysty damytý úshin árqashan esigimiz ashyq ekenin jetkizdi.
