Bas múftı barsha din qyzmetkerin Táýelsizdik merekesimen quttyqtady (FOTO)
Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Táýelsizdik kúni merekesine oraı onlaın rejımde jınalys ótkizdi. Jınalysqa QMDB Ortalyq apparat qyzmetkerleri men oblys ımamdary qatysty.
Májiliste Bas múftı Naýryzbaı qajy Taǵanuly QMDB qyzmetkerlerin táýelsizdik merekesi kúnimen quttyqtap: «Barshańyzdy Alla Taǵalanyń halqymyzǵa bergen teńdessiz syıy – táýelsizdik kúni merekesimen shyn júrekten quttyqtaımyn. Mereıli merekemiz qutty bolsyn! Otbasylaryńyzǵa baq pen bereke, birlik pen tatýlyq tileımin.
Halqymyzda «Egemendi el kórikti, betegeli bel kórikti» degen naqyl sóz bar. Allaǵa shúkir, táýelsizdigimizdiń arqasynda meshitterimiz ashylyp, medreselerimiz boı kóterdi. Qurban aıt qurmetine demalys jarııalanyp, qulshylyq jasaýǵa erkindik aldyq. «Táýbeniń zory – Táýelsizdik» degen tálimdi sózdiń taǵylymy osynda jatsa kerek. Alla Taǵala elimizdiń órkendeýi men jerimizdiń kórkeıýi jolynda aýyzbirshilik tanytýda barshamyzǵa tabandylyq pen turaqtylyq násip etkeı. Táýelsizdigimiz baıandy bolsyn!» degen merekelik lebizin jetkizdi.
Jınalys sońynda oblystyń bas ımamdary merekelik tilegin arnady.
