Bas múftı bas hatshymen Islam akademııasynyń oqytý júıesin talqylady (FOTO)
Elordada Bas múftı Naýryzbaı qajy Taǵanuly Ál-Azhar ýnıversıteti janyndaǵy Islam zertteýleri akademııasynyń bas hatshysy Nazır Muhammed Aıad myrzamen kezdesti.
Kezdesýde Qazaqstan jáne Mysyr arasyndaǵy tarıhı-rýhanı baılanysty nyǵaıtýdyń mańyzy sóz boldy. «Bizdiń Mysyrǵa jasaǵan is-saparymyz jemisti boldy. Ál-Azhar ýnıversıtetiniń sheıhy, doktor Ahmet Taıyp bizdiń usynysymyzdy qoldap, Qazaqstanǵa bólinetin 25 bilim grantyn eki esege ulǵaıtý týraly sheshim qabyldady. Bul tarıhı jańalyq elimizdegi musylman qaýymyn qýanyshqa bóledi. Osy sátti paıdalanyp, doktor Ahmet Taıypqa jáne ýnıversıtet ujymyna taǵy da aıryqsha alǵysymdy bildiremin», – dedi Naýryzbaı qajy Taǵanuly.
Óz kezeginde akademııa bas hatshysy Nazır Muhammed Aıad Qazaqstan musylmandary dinı basqarmasyna árqashan qoldaý kórsetetinin jetkizdi. Basqosýda Nur-Sultan qalasynda salynatyn Islam akademııasynyń oqytý júıesi talqylandy.
