Bas múftı bastaǵan delegatsııa Ankarada ekijaqty kezdesýge qatysty (FOTO)

Búgin Qazaqstan musylmandary dinı basqarmasynyń tóraǵasy Serikbaı qajy Oraz Ankarada Túrkııa din isteri basqarmasynyń tóraǵasy, professor Álı Erbashpen kezdesti.

Resmı kezdesýge QMDB tóraǵasynyń Birinshi orynbasary, Nur-Sultan qalasynyń Bas ımamy Naýryzbaı qajy Taǵanuly, Bas múftı keńesshisi Baltabaı Mekejanov, Sharıǵat jáne pátýa bóliminiń meńgerýshisi Sansyzbaı Qurbanuly, Nasıhat jáne qoǵammen baılanys bóliminiń meńgerýshisi Altynbek Utyshanuly, Is basqarýshy Erbosyn Oryn, Qajylyq jáne umra bóliminiń meńgerýshisi Jándilla Bekjigitov, Baspa jáne aýdarma bóliminiń meńgerýshisi Murat Ábdihalyqov, baspasóz hatshysy Aǵabek Qonarbaıuly qatysty.

Basqosýda Qazaqstan men Túrkııa musylmandary dinı basqarmasy arasynda qabyldanǵan yntymaqtastyq týraly ekijaqty kelisimniń júzege asýy, oqý-aǵartý salasy boıynsha ımamdardyń bilimi men tájirıbesin arttyrý, dinı ózekti máselede ortaq pátýa shyǵarý, baýyrlastyq baılanysty arttyrý, t.b. baǵyttar boıynsha ıgi jobalar jaıy sóz boldy.
Bas múftı túrki jurtynyń ǵulamasy ál-Farabıdiń 1150, hákim Abaıdyń 175 jyldyq mereıtoıyna oraı ortaq ıgi sharalardy júzege asyrýdyń mańyzdylyǵyn atap ótti.

Serikbaı qajy Oraz qazaqstandyq ımamdardyń bilimi men tájirıbesin arttyrýǵa qoldaý kórsetip kele jatqan Túrkııa din isteri basqarmasynyń tóraǵasy Álı Erbashqa alǵysy men izgi nıetin jetkizdi. Aıta ketsek, búginde Túrkııada "Hasekı" syndy joǵary dinı oqý oryndarynda qazaqstandyq 47 ımam bilimin shyńdaýda.

Kezdesý barysynda baýyrlas elderdiń baılanysyn arttyra berýdiń mańyzdylyǵy sóz boldy. Serikbaı Satybaldyuly qurmet pen izettiliktiń belgisi retinde qazaqy saltpen Álı Erbashtyń ıyǵyna shapan japty.

Basqosý sońynda taraptar ekijaqty kelisim men yntymaqtastyq aıasyn keńeıtýge ýaǵdalasty.